गोरखा । गोरखा साना शहरी खानेपानी तथा सरसफाई उपभोत्ता समितिले आफ्ना उपभोत्तालाई खानेपानी भनेर बिषाक्त पानी वितरण गर्ने गरेको तथ्य खुलेको छ ।
गोरखाको मुख्य मुख्य बजारमा पानी वितरण गर्दै आएको समितिले उपभोत्तालाई लेदो तथा बिषाक्त पानी वितरण गर्दै आएको उपभोत्ताहरुले गुनासो गरेका छन् । ‘पिउने पानी भनेर लेदो, फिज आएको र दमिलो पानी दिने गरेको’ गोरखा नगरपालिका ६ को कालिमाटी बजारमा होटल ब्यवसाय गर्दै आएका मनोज थापाले बताए ।
बिहीबार मात्रै पनि कालिमाटी, हरमटारी, हस्पीटल लाईन, लोकतान्त्रिक चोक देखी खोलखोले सम्मका उपभोत्तालाई लेदोपानी वितरण गरेको गोरखा समाचार प्राप्त तस्बिरमा प्रष्टै देखिन्छ ।
माग थेग्न नसकेका कारण खोलामा आएको पानी जस्ताको तस्तै तानेर बितरण गर्ने गरेको पृथ्वीनारायण साना शहरी खानेपानी तथा उपभोत्ता समितिको कार्यालयले जनाएको छ । माग अनुसारको पानी विरतणमा समस्या झेल्दै आएको समितिले खोलामा आएको लेदोपानी नै सिधै तानेर वितरण गर्ने गरेको हो ।
‘उपभोत्ताले जस्तो पानी भए पनि दिनु परर्यो भन्छन् । त्यसैले हामीले जस्तो पानी आयो त्यस्तै छाड्ने गरेका छौ’ भन्छन् समितीका कर्मचारी आशकाजी श्रेष्ठ । कर्मचारी श्रेष्ठका अनुसार गोरखा नगरपालिकाको वडा नम्बर ६, ७ र ८ मा १ हजार २७९ घर परिवारलाई समितिले पानी उपलब्ध गराउदै आएको छ ।
दैनिक ५ लाख लिटर भन्दा बढी पानीको माग भएता पनि समितीले मुस्कीलले ३ लाख लिटर वितरण गर्दै आएको छ ।
गल्ती भयो कर्मचारीलाई सचेत गरेका छौ : अध्यक्ष अर्याल
बिषाक्त पानी वितरण भएको बिषयमा गोरखा समाचारले समितिका अध्यक्ष बिनोद अर्याल संग प्रश्न गर्दा गल्ती भएको स्विकार गर्दै कर्मचारीलाई सचेत गराएको र अब देखी त्यस्तो गल्ती नहुने बताए ।
‘होटल ब्यवसायीहरुले जस्तो पानी भए पनि चाहियो भनेर पानी वितरण गर्ने कर्मचारीलाई थर्काउने गरेको’ गुनासो गर्दै अध्यक्ष अर्यालले ‘आजै हामीले पानी वितरण गर्ने सबै कर्मचारीलाई सचेत गराएको र अब त्यस्तो पानी वितरण नहुने’ भने ।
स्थापना काल देखी नै विवादमा तानिएको समिति पहिलो पटक यस्तो पानी वितरण गरेको भने होइन । बर्षा लाग्दा लेदो पानी र ढल मिसिएको पानी र सुख्खा याममा हप्तामा १ दिन पनि उपभोत्ताको घरमा पानी नआउने गुनासो बर्षौ देखी चल्दै आएको छ ।
के भएको रहेछ बुझछौ : प्रमुख जिल्ला अधिकारी
उपभोत्ताको घरमा बिषाक्त पानी विरतण भएको भन्ने बारेमा हामीले गोरखामा प्रमुख जिल्ला अधिकारी शंकरहरी आचार्य संग बुझने कोशिस गरेका थियौं । प्रजिअ आचार्यले गुनासो आएको जानकारी दिदै तत्कालै समितिका पदाधिकारीलाई ढाकेर के भएको हो जानकारी लिने र सचेत गराउने बताए ।
प्रत्यक्ष सर्व साधारणको स्वास्थ्यमा गंभिर असर गर्ने यस्ता खालका गतिविधीले समितिको नाम त बदनाम हुन्छ नै समितिका पदाधिकारीहरुले पनि यसको जवाफ उपभोत्ता दिनुपर्ने हुन्छ ।
यस्ता खालका गतिविधीले सर्व साधारणको स्वास्थ्यमा पार्ने गंभिर असरको जिम्मेवारी कसले लिने हो ? यस बिषयमा समय छदै उपभोत्ता र सरोकारवालाले ध्यान दिन सकेन भने भोलीको परिणाम नराम्रो हुने निश्चित छ ।
सामाजिक सञ्जालमा भेटिएका केही टिप्पणीहरु
