गोरखा । राप्रपा गोरखाको हालै सम्पन्न गरेको जिल्ला अधिवेशन बदर भएको छ ।
जिल्ला सदरमुकामको निर्माण ब्यवसायीको हलमा भाद्र २८ र २९ गते सम्पन्न जिल्ला अधिवेशनलाई निर्वाचन प्रकृया पुरा नगरी गरेको भन्दै केन्द्रीय निर्वाचन समितिले बदर गरिदिएको हो ।
मंगलबार बसेको केन्द्रीय निर्वाचन समितिको बैठकले गोरखाको सम्पन्न अधिवेशन बदर गर्ने निर्णय गरेको केन्द्रीय सदस्य हिक्मतजंग भण्डारीले बताए ।
मंगलबार नै केन्द्रिय समितिले जिल्ला निर्वाचन समितिलाई मंगलबार पत्र पठाउँदै सम्पन्न निर्वाचन बदर भएको जानकारी गराएको भण्डारीले जानकारी दिए ।
भाद्र २९ गते सम्पन्न अधिवेशनले सुदीप ढकालको नेतृत्वमा जिल्ला कार्य समिति चयन गरेको भएता पनि जिल्ला निर्वाचन संयोजकबाट प्राप्त दस्तावेज र अन्य सम्बन्धित दस्ताबेजले निर्वाचनको प्रकृया पुरा गर्न चुकेको र पछिल्लो समय केन्द्रीय निर्वाचन समितिमा जिल्लाको अधिवेशन बारे परेका उजुरीहरु छानबिन गर्दा सम्पन्न निर्वाचन बदर गर्न उपयुत्त देखिएको भन्दै जिल्ला अधिवेशन बदर गरीएको राप्रपा केन्द्रय समितिले जनाएको छ ।
निर्वाचन समितिलाई पुनः असोज २० गते निर्वाचन गराउने गरी निर्देशन दिदै केन्द्रीय निर्वाचन समितिका अध्यक्ष हरिबहादुर बस्नेतले पत्राचार गरेको छ ।
सोही अधिवेशनमा अध्यक्षकालागी भगवानदास मल्ल, रामराजा कोराईराला, राम अर्याल लगायतले जिल्ला निर्वाचन समिति र केन्द्रीय निर्वाचन समिति समक्ष सो निर्वाचन प्रक्रिया बदर गराउन माग गर्दै उजुरी गरेका थिए ।