गोरखा । बिद्यालय बन्द भएको बेला पनि बिद्यार्थीहरुलाई आवासीय छात्रवृत्ति दिएको भन्दै त्यस्तो रकम असुल गरेर कोषमा दाखिला गर्न महालेखाले भनेको छ ।
कोरोना महामारीका बेला बिद्यालय बन्द भएको र शैक्षिक क्रियाकलाप सञ्चालन नभएको भन्दै गोरखाको आरुघाट, चुमनुब्री र धार्चेको ११ बिद्यालयबाट ४७ लाख २८ हजार रुपैयाँ असुल गरी संघीय सञ्चित कोषमा दाखिला गर्न महालेखाले भनेको हो ।
आवासीय छात्रवृत्ति अन्तरर्गत प्रत्येक बर्ष बिद्यालयमा अध्ययनरत बिद्यार्थीहरुले बर्षको १० महिना बरावर महिनाको ४ हजार रुपैयाँले पाउने गर्दछ । तर कोरोनाका कारण बिद्यालय बन्द भई शैक्षिक क्रियाकलपा सञ्चालन नरहेकोले बैशाख देखी आषाढसम्मको आवासीय छात्रवृत्ति बापतको रु ४७ लाख २८ हजार असुल गरेर कोषमा दाखिला गर्न महालेखाले भनेको हो ।
महालेखाको ५८औं बार्षिक प्रतिवेदन २०७८ को २४४ नम्बरमा आवासीय छात्रवृत्ति सम्वन्धी निर्णय सार्वजनिक गर्दै ‘कार्यक्रम कार्यान्वयन पुस्तिका अनुसार सार्वजजानिक बिद्यालयमा आवासमा बसी अध्ययन गर्ने बिद्यार्थीहरुका लागि प्रति बिद्यार्थी प्रति महिना रु ४ हजारका दरले दश महिनाको आवासीय छात्रवृत्ति अनुदान दिने उल्लेख’ भएको भन्दै ‘यो बर्ष गोरखाका आरुघाट, चुमनुब्री र धार्चे गाउँपालिकाले ११ बिद्यालयलाई १० महिनाका लागि आवासीय छात्रवृत्ति निकासा गरेको’ जनाएको छ ।
महालेखाकै सोही प्रतिवेदनमा ‘कोभिड–१९ का कारण २०७६–१२–११ गतेदेखि पालिकाका सबै बिद्यालय बन्द भई शैक्षिक क्रियाकलाप सञ्चालनमा नरहेकोले बैशाखदेखि आषाढसम्मको आवासीय छात्रवृत्ति रु ४७ लाख २८ हजार असुल गरी संघीय सञ्चित कोषमा दाखिला गर्नुपर्दछ’ भनिएको छ ।
पालिका मार्फत प्राप्त सूचना अनुसार आरुघाट गाउँपालिकाको थुमीमा रहेको जलकुमारी मावि, मान्बुमा रहेको भवानी मावि, धार्चे गाउँपालिकाको मणीकाम देवी मावि र केरौजा मावि र चुमनुब्रीमा रहेको फिलिमको बुद्व मावि, ल्होमा रहेको ल्हो आधारभूत बिद्यालय, प्रोकमा रहेको नुब्री आधारभूत बिद्यालय, सामागाउँमा रहेको गौरी शंकल आधारभूत बिद्यालय, चुम्चेतमा रहेको सिद्व गणेश आधारभूत बिद्यालय, छेकम्पारमा रहेको बुद्व आधारभूत बिद्यालय र बिहीमा रहेको सेराङ गुम्बा आधाभूत बिद्यालयले संघ सरकार मार्फत प्राप्त आवासीय छात्रवृत्ति पाउदै आएको छ ।