काठमाण्डौं – नेकपा एमाले खनाल–नेपाल पक्षको बैठकले आफ्ना साँसदहरु प्रतिनिधिसभाको आजको बैठकमा उपस्थित नहुने निर्णय गरेको छ ।
सिंहदरबारमा बिहान बसेको बैठकले प्रतिनिधिसभाको आजको बैठकमा अनुपस्थित रहने र राजीनामा पनि नदिने निर्णय गरेको नेता भीम रावलले जानकारी दिए ।
सांसदहरूको बैठकमा राजीनामा दिएर पनि केपी ओलीकै सरकार निरन्तर रहने गरी राजनीति अघि बढ्यो भने के गर्ने ? भन्ने प्रश्न समेत गरेका थिए । केही सांसदले राजीनामा दिएर आत्मघाती बाटोमा जानुभन्दा आजको संसद बैठकमा अनुपस्थित रहेर अझै विकल्पहरु बाँकी राख्ने सुझाव दिए पछि बैठकले सोही अनुसार गर्ने निर्णय गरेको हो ।
पार्टी एकताका पक्षमा आफूहरूले हदैसम्मको लचकता अपनाएपनि प्रधानमन्त्री एवं पार्टी अध्यक्षले बेवास्ता गरेको भन्दै रावलले सञ्चारकर्मीहरु बिच संविधानविपरीत उभिने प्रधानमन्त्रीलाई विश्वासको मत दिन नसकिने बताए ।
