काठमाण्डौं – बिदामा बसेका चिकित्सक र स्वास्थ्यकर्मीलाई तत्कालै सम्वन्धीत कार्यालयमा हाजिर हुन स्वास्थ्य तथा जनसंख्या मन्त्रालयले निर्देशन गरेको छ ।
दिनानुदिन कोरोना संक्रमणको बिरामी बढ्न थालेको भन्दै मन्त्रालयले बिदामा बसेका कर्मचारीहरुलाई तत्कालै हाजिर हुन भनेको हो ।
मन्त्रालयको स्वास्थ्य आपतकालीन कार्य सञ्चालन केन्द्रले मंगलबार अस्पतालहरुलाई पत्र लेख्दै स्वास्थ्यकर्मीलाई लामो बिदा नदिन र बिदामा बसेकाहरुलाई पनि बोलाउन निर्देशन समेत दिएको छ ।
त्यस्तै कार्यरत जनशक्तिमध्ये ५० प्रतिशतको पालो निर्धारण गरी सेवा दिन, दरबन्दी अनुसार कुनै पद रिक्त भएमा तत्काल जनशक्ति व्यवस्थापन गर्न, थप जनशक्ति चाहिए ६ महिनाका लागि करारमा लिन पनि निर्देशन दिएको छ ।
मन्त्रालयले आकस्मिक उपचार दिने तर बहिरंग सेवा र अति आवश्यक बाहेकका शल्यक्रिया नगर्न पनि निर्देशन दिएको छ । मन्त्रालयलेअस्पतालहरुलाई पठाएको पत्रमा सघन उपचार तथा आकस्मिक उपचारसम्बन्धी आवश्यक औजार उपकरण र अक्सिजनको व्यवस्था गर्न पनि भनेको छ ।
