एजेन्सी – सैनिक कु विरुद्धको प्रदर्शनमा उत्रिएका म्यानमारी जनतालाई त्यहाँको सैनिकले वर्वर दमन गरेको छ । शनिबार मात्रै प्रर्दशनमा उत्रिएकाहरु मध्ये ११४ जनाको सैनिकहरुले हत्या गरेका छन् ।
प्रदर्शनकारीमाथि सनिबार सुरक्षाकर्मीले गोली चलाउँदा एकै दिन मृत्यु भएको यो अहिलेसम्मकै ठुलो संख्या हो । मारिनेमा बालबालिका समेत रहेका छन् ।
सेनाको बल प्रयोगले अहिलेसम्मकै ठूलो संख्यामा मानिस मारिएको निगरानी समूह एसिस्टेन्स एसोसिएशन फर पोलिटिकल प्रिजनर्सले जनाएको छ ।
स्थानीय सञ्चारमाध्यमहरुका अनुसार मृतकको संख्या यकिन हुन सकेको छैन । यो संख्या अझै बढ्न सक्ने बताइएको छ । चरा र खुकुरा झैं सेनाले मान्छे मारिरहेको अन्तर्राष्ट्रिय सञ्चारमाध्यमले जनाएका छन् ।
अमेरिका, बेलायत तथा युरोपेली युनियनका अधिकारीहरुले हिंसाको निन्दा गरेका छन् । बेलायतका राजदूत डान चगले विज्ञप्ति निकालेर निर्दोष नागरिकमाथि गोली चलाएर म्यानमारको सेनाले आफ्नो प्रतिष्ठा गुमाएको बताएका छन् ।
प्रदर्शनकारीमाथि गोली चल्दै गर्दा सेना दिवसको अवसरमा म्यानमारका सैनिक प्रमुख जनरत मिन आङ लाइङले प्रजातन्त्र सुरक्षित रुपमा पुनःस्थापित गर्ने प्रतिबद्धता जनाएका थिए । सोही दिन सेनाले चरम दमन गरेको हो ।
निर्वाचनमा आफू समर्थित दलको नराम्रो हार भए संगै सेनाले फेब्रुअरीमा शासन हत्याएको थियो । म्यानमारमा सेना विरोधी प्रदर्शनका क्रममा अहिलेसम्म ४ सयभन्दा धेरै प्रदर्शनकारीको मृत्यु भैसकेको छ ।
