पोखरा – प्रधानमन्त्री केपी शर्मा ओलीले आफूमाथि कुनै पनि बेला भौतिक हमला हुन सक्ने बताएका छन् ।
सोमबार पोखरामा आयोजित गण्डकी प्रदेश स्तरीय कार्यकर्ता भेला तथा प्रशिक्षण कार्यक्रममा बोल्दै प्रधानमन्त्री ओलीले आफूमाथि शारीरिक आक्रमण हुन सक्ने बताएका हुन् ।
उनले शारीरिक हमला नै भयो र ज्यान तलमाथि भयो भने पनि कुनै अनौठो नमान्न भन्दै कार्यकर्ताको मन जित्ने प्रयास गरे ।
प्रधानमन्त्री ओलीले माधवकुमार नेपाललाई आफूले राजनीतिमा ल्याएको र अहिले उनलाई राजनीतिमा नल्याएको भए हुनेरहेछ भन्ने लागेको बताए । ओलीले नेपाललाई त्यतिबेला राम्रो मान्छे ठानेर ल्याएको तर अहिले उनी खराब सावित भएको दाबी गरे ।
ओलीले पुष्पकमल दाहालको पनि दरबार र खराब मानिसहरुसँग बाक्लो साँठगाँठ रहेको बताए । दाहालको दरबारसँगको साँठगाँठ भनेर साध्य छैन भन्दै ओलीले खराब तत्वहरुसँग साँठगाँठ रहेको आरोप लगाए ।
ओलीले नेत्र विक्रम चन्द समूहलाई सुतली बम पड्काएर जनतालाई नतर्साउन आग्रह गर्दै भयरहित देश बनाउने अभियानमा लाग्न आग्रह गरे । उनले नियुक्ति दिनेले बदर पनि गरिदिन सक्ने भन्दै दाहाल–नेपाल समूहका केन्द्रीय सदस्यदेखि सांसदहरुलाई हटाइदिने धम्की समेत दिए भ्याए ।
