काठमाण्डौं – राष्ट्रपति विद्यादेवी भण्डारीले संसद अधिवेशन आह्वान गरेकी छन् । उनले सरकारको सिफारिसअनुसार फागुन २३ गते अपराह्न ४ः०० बजेकालागि संसद अधिवेशन आह्वान गरेकी हुन् ।
शुक्रबार बसेको मन्त्रिपरिषद बैठकले २३ गते बैठक बोलाउने विषयमा छलफल गरेको थियो । तर सोमबार विहान बसेको मन्त्रिपरिषद बैठकले औपचारिक पत्र पठाएपछि राष्ट्रपति भण्डारीले बैठक आह्वान गरेकी हुन् ।
संसद अधिवेशन आह्वान भएसँगै प्रतिनिधिसभाबाट नयाँ सरकार गठनको पहल शुरु हुने भएको छ । प्रधानमन्त्री केपी शर्मा ओलीले पुस ५ गते प्रतिनिधि सभा विघठन गरेका थिए ।
तर सर्वोच्च अदालतले त्यसलाई बदर गर्दै १३ दिनभित्र संसद बैठक बोलाउन आदेश गरेको थियो । सोही आदेश अनुसार मन्त्रिपरिषदको सिफारिसमा राष्ट्रपतिले संसद बैठक आह्वान गरेकी हुन् ।
