काठमाण्डौं – प्रधानमन्त्री केपी शर्मा ओलीले आज सुरक्षा परिषदको बैठक लगत्तै मन्त्रिपरिषद् बैठक समेत बोलाएका छन् । बैठक प्रधानमन्त्री निवासमा बालुवाटारमा बस्दैछ ।
मंगलबार बसेको सुरक्षा परिषद्को बैठकमा मुलुकको पछिल्लो राजनीतिक घटनाक्रम र सुरक्षा अवस्थाबारे छलफल भएको थियो । संसद् विवघटनको मुद्दामा सर्वोच्च अदालतले फैसाला सुनाउने तयारी गरिरहेका बेला बोलाइएको सुरक्षा परिषद्को आकस्मिक बैठक र लगत्तै राखिएको मन्त्रिपरिषदलाई अर्थपूर्ण रुपमा हेरिएको छ ।
मन्त्रिपरिषद् बैठकमा भने विप्लव नेतृत्वको नेकपामाथि सरकारले लगाएको प्रतिबन्ध फुकुवा र वार्ता सम्बन्धमा छलफल हुने बताइएको छ ।
शनिबार विज्ञप्ति नेत्रविक्रम चन्द ‘विप्लव’ समूहले सरकारसँग वार्ता गर्न सकारात्मक रहेको जनाएको थियो । विप्लवले सहज रुपमा गतिविधि र कार्यक्रम गर्ने वातावरण सरकारले बनाएको खण्डमा वार्ता हुने बिज्ञप्तीमा उल्लेख गरेको थियो ।
सम्भवतः आज बस्ने मन्त्रिपरिषद् बैठकले विप्लवको वक्तव्यलाई सम्बोधन गरी प्रतिबन्ध फुकुवा र औपचारिक पत्रका विषयमा निर्णय लिने तयारीमा सरकार जुटेको अनुमान गरिएको छ ।
