काठमाण्डौं – दाहाल–नेपाल समूहकी नेतृ रामकुमारी झाँक्रीलाई सोधपुछकालागी भन्दै प्रहरीले बोलाएको छ ।
केही साता अगाडी गोरखाको एक कार्यक्रममा राष्ट्रपती बिद्यादेवी भण्डारीलाई अपमान जनक शब्द प्रयोग गरेको भन्दै महानगरीय अपराध महाशाखाले झाँक्रीलाई फोन गरेर आज छलफलका लागि बोलाएको हो । महाशाखाका प्रमुख एसएसपी दीपक थापाले झाँक्रीलाई बोलाइएको स्विकार गरेका छन् ।
प्रधानमन्त्री केपी ओली समूहको नेकपा निकट अखिल नेपाल महिला संघ (अनेमसंघ)का पदाधिकारीहरुले झाँक्रीलाई कारबाहीको माग गर्दै गृहमन्त्री रामबहादुर थापालाई ज्ञापन पत्र बुझाए संगै मन्त्री थापाले कारवाहीको लागि प्रहरीलाई निर्देशन दिएका थिए ।
गोरखामा आयोजित एउटा कार्यक्रममा झाँक्रीले भण्डारीलाई ‘राष्ट्रपतिका कुरा त के गर्नु ? म बडामहारानीलाई गोरखाबाटै सन्देश दिन चाहन्छु, निर्वाचनको तयारीका लागि सुखसुविधा ऐश–आराम छाडेर शीतलनिवास छाडेर पहिला कोटेश्वरमा आउनुस् । चाबहिल कि कता बानेश्वरतिर बसाइ छ भन्ने सुन्या छु । होइन भने बालकोटै गए पनि हुन्छ । नेपालको कुन जिल्लाबाट चुनाव लड्ने हो ? त्यसको तयारी गरेर सन्देश पठाउनुस्, तपाईंसँग म पनि भारी हुन्छु’ भनेका थिए ।
