बागलुङ – बागलुङ जिल्लाको निसीखोला गाउँपालिकामा जीप दुर्घटना हुँदा चालकको मृत्यु भएको छ भने अन्य ७ जना घाइते भएका छन् ।
बुधबार साँझ निसीखोला गाउँपालिका २ को बाहुनगाउँदेखि ३ को छापखानीतर्फ जाँदै गरेको ग. ३ च २७१३ नम्बरको जीप दुर्घटना हुँदा २६ वर्षीय चालक कमरा रोका मगरको मृत्यु भएको हो ।
सोही घटनामा परी अन्य ७ जना घाइते भएको जिल्ला प्रहरी कार्यालय बागलुङले जानकारी दिएको छ ।
दुर्घटनामा घाइते हुनेहरुमा निसीखोला ३ का ५४ वर्षीय प्रेम विक, २७ वर्षीया बिरमला विक, १ वर्षीय सुवास विक, २४ वर्षीया मनि विक, २१ वर्षीया रतना सुनार, ६ वर्षीय योजन विक र रुपन्देही देवी नगरका ५ वर्षीय सत्य लोहार रहेको प्रहरी कार्यालयले जनाएको छ ।
कुलपूजाका लागि गएका उनीहरु घर फर्किने क्रममा दुर्घटनामा परेको हो । घाइते सातै जनालाई उद्धार गरी बुर्तिबाङ प्राथमिक स्वास्थ्य केन्द्रमा उपचारका लागि पठाइएको प्रहरीले पुष्टी गरेको छ । दुर्घटनाको कारण भने खुल्न सकेको छैन ।
