गोरखा – गोरखा सदरमुकाममा कोरोना संक्रमितहरुको संख्या बढ्न थाले संगै नगरपालिका र नगरक्षेत्र भित्र सञ्चालित सबै बिद्यालयलाई आजबाट बन्द गराईएको छ ।
नगरपालिकामा काममा कार्यरत कर्मचारी देखी जनप्रतिनिधी सम्म संक्रमण देखिएको भन्दै आउदो २८ गते सम्म संक्रमण बढ्न सक्ने भन्दै नगरक्षेत्र भित्रको सबै बिद्यालयलाई मंसिर ६ गते सम्म बन्द गराईएको गोरखा नगरपालिकाले जनाएको हो ।
गोरखा नगरपालिकाले हिजो (आइतबार) एक सूचना प्रकाशन गर्दै नगरक्षेत्र भित्रको १४ वटै वडाबाट अत्यावश्यकीय सेवा बाहेक अन्य सबै सेवा कार्तिक २८ गते सम्मका लागि बन्द गरिएको जानकारी गराएको हो । कार्यालयले जोखिम न्यूनिकरण गर्नकालागि सबै वडा कार्यालय र नगरपालिकाको अफिस बन्द गर्नुपरेको जनाएको छ ।
नगरपालिकाले सोही सूचनामा आज (सोमबार) देखी लागु हुने गरी नगर क्षेत्र भित्रका सबै प्रकारका बिद्यालयलाई १३ दिन अर्थात मंसिर ६ गते सम्म बन्द गराउन निर्देशन दिएको छ । नगरपालिकाको सो निर्देशन अनुसार नगर क्षेत्र भित्रका कुनै पनि बिद्यालय आज देखी सञ्चालनमा आउने छैनन् ।
कार्यालयले नगरक्षेत्र भित्रका केही शिक्षकहरुमा समेत कोरोना संक्रमण देखिएको अन्यत्र संक्रमण फैलन नदिनका लागि सबै प्रकारको बिद्यालयलाई बन्द गर्ने निर्णय गरेको हो । नगरक्षेत्र भित्र १७ सरकारी र ५० सरकारी गरी कुल ६७ बिद्यालयमा १६ हजार भन्दा बढी बिद्यार्थीहरुले अध्ययन गर्दै आएका छन् ।
