गोरखा – नेपालीहरुको चाडबाड नजिकीएको र सर्व साधारण जिल्ला भित्रने क्रम शुरु भएको भन्दै जिल्ला भित्रका कच्ची सडक मर्मत गर्न सम्वन्धीत सरोकारवालाहरुलाई प्रशासनले निर्देशन दिएको छ ।
जिल्ला प्रशासन कार्यालय गोरखाले विभिन्न सरकारी निकायहरुलाई पत्र काट्दै तत्कालै जिल्ला भित्रको सबै सडक मर्मत थाल्न भनेको हो ।
प्रशासनले सडक डिभिजन कार्यालय दमौली तनहुका साथै जिल्ला भित्रका सबै स्थानिय तह, पुष्पलाल (मध्यपहाडी) राजमार्ग योजना कार्यालय, ११ किलो–छेवेटार–भालुस्वारा–बारपाक सडक योजना, पूर्वाधार बिकास कार्यालय र जिल्ला आयोजना कार्यान्वयन इकाई (अनुदान ब्यवस्थापन तथा स्थानिय पूर्वाधार) कार्यालय गोरखालाई पत्राचार गर्दै ‘आफ्नो कार्य क्षेत्रभित्र पर्ने नियमित सञ्चालन हुने सडकहरु गत साउन–भाद्र महिनामा परेको मनसुन बर्षातको कारण क्षति पुर्याएको देखिएकोले’ मर्मत गरी आवागमनलाई सहज बनाउन भनेको छ ।
प्रशासनले गरेको पत्राचारमा ‘संभावित सडक दुरर्घटना न्यूनिकरण गर्न तथा दशैं, तिहार, छट लगायतका चाडपर्वहरु नजिकिए संगै स्वदेश तथा बिदेशबाट जिल्लाबासीहरु चाडपर्व मनाउन आ–आफ्नो गाउँ÷ठाउँ फर्कने क्रम बढ्ने भएकोले सहज आवागमनको ब्यवस्था गर्न नियमित सरसफाई तथा आकस्मिक मर्मत संभार गरी आवागमन सहजता हुने ब्यवस्था मिलाउन’ भनेको छ ।
चाडपर्ब लक्षित गरेर स्थानिय तहमा मानिसहरु आउने क्रम ह्वात्तै बडेको छ । स्वदेश तथा विदेशबाट गाउँमा शहरमा आउने क्रम बढे संगै प्रशासनले सरोकारवालाहरुलाई निर्देशन जारी गरेको हो ।
