काठमाण्डौं – नोबल कोरोना भाइरस (कोभिड–१९)बाट अहिले सम्मकै धेरै संक्रमित भएका छन् । आज मात्र नेपालमा एकै दिनमा थप १ हजार ४५९ जनामा संक्रमण पुष्टि भएको छ ।
देशको विभिन्न प्रयोगशालामा गरिएको परिक्षणका क्रममा आज थप १ हजार ४५९ जनामा संक्रमण देखिएको स्वास्थ्य तथा जनसंख्या मन्त्रालयले पुष्टी गरेको हो ।
मन्त्रालयले आज गरेको नियमित पत्रकार सम्मेलनमा मन्त्रालयका प्रबत्ता डा.जागेश्वर गौतमका अनुसार देशभरबाट संकलित १० हजार ३७५ स्वाब परीक्षण गर्दा ४४६ जना महिला र १ हजार १३ जना पुरुषमा संक्रमण पुष्टि भएको हो । योसँगै नेपालमा कोरोना संक्रमित हुनेको संख्या ५६ हजार ७८८ पुगेको छ ।
उपत्यकामा ६७६ जनामा संक्रमण
काठमाण्डौं उपत्यकामा आज ६७६ जनामा संक्रमण पुष्टि भएको छ । जस मध्ये काठमाण्डौंमा ५५५ जना, भक्तपुरमा ८६ जना र ललितपुरमा ३५ जना संक्रमित थपिएका छन् ।
थप ११ जनाको मृत्यु
पछिल्लो २४ घन्टामा संक्रमणबाट थप ११ जनाको मृत्यु भएको छ । मृत्यु हुनेमा ४ महिला र ७ जना पुरुष रहेका छन् ।
काठमाण्डौं, बारा, सिरहा र रुपन्देहीमा १÷१ जना महिलाको मृत्यु भएको छ भने काठमाण्डौंमा ३, बारा, सर्लाही, मकवानपुर र कपिलवस्तुमा १÷१ जना पुरुषको मृत्यु भएको छ । योसँगै कोरोनाबाट मृत्यु हुनेको संख्या ३७१ पुगेको छ ।
