काठमाण्डौं – नेपालमा युवा वैज्ञानिकहरूले नेसनल योङ एकेडेमी नेपाल (नयन) गठन गरिएको छ ।
युवा बैज्ञानिकहरुको आवाजलाई उठाउने उद्देश्यले सा वैज्ञानिकहरूको संस्था नयन गठन भएको हो ।
डा.वसन्त गिरीको अध्यक्षतामा डा.उत्तमबाबु श्रेष्ठ, डा.बालकुमारी ओलिया, डा.सुरज भट्टराई, डा.विशेष खनाल, डा.स्मृति पन्त र डा.सागर रेग्मी रहेको ७ सदस्यीय तदर्थ समिति समेत गठन भएको छ ।
नयन गठन गर्नुभन्दा अघि नै उनीहरुले गतवर्ष कै भदौ, कात्तिक र पुसमा बृहत् भेला तथा छलफल गरेका थिए ।
विश्वभर एकेडेमीलाई प्राज्ञिक उत्कृष्टताको केन्द्रको रूपमा लिइन्छ र त्यसका प्राज्ञ वा सदस्यहरू प्राज्ञिक उत्कृष्टताका आधारमा छर्नाैट गरिने प्रचलन रहिआएको छ ।
संस्थाको सदस्य बन्न उमेरको हदबन्दी राखिएको छ । यस एकेडेमीकोमा जुनसुकै शैक्षिक विधाका अनुसन्धानकर्ताहरूले पनि सदस्यता लिन सक्ने नयनले जनाएको छ । यो एकेडेमीमा कानुन, समाजशास्त्र, मानवशास्त्र, चिकित्सा विज्ञानलगायतका विषयका अनुसन्धानकर्ता अध्येताहरूले सदस्यता लिन पाउनेछन् ।
विश्वका ४१ देशमा त्यस्तो राष्ट्रिय एकेडेमी खोलिएको र उनीहरूसँग नेपालको युवा वैज्ञानिक एकेडेमीले पनि हातेमालो गर्दै अगाडि बढ्ने विश्वयुवा वैज्ञानिक एकेडेमीका सदस्यसमेत रहेका डा.उत्तमबाबु श्रेष्ठले बताए ।
उक्त एकेडेमीले नेपाली युवा अध्यताहरूको अवस्थाका बारेमा बुझ्न राष्ट्रियस्तरको सर्वेक्षण पनि आजैदेखि सुरु गरेको छ । उक्त सर्वेक्षण नेपालमा पहिलो पटक गरिन लागेको हो । सर्वेक्षणपछि नेपालका युवा अध्येताहरूको वास्तविक अवस्था थाहा हुनेछ । यसले युवा वैज्ञानिकहरू केन्द्रित नीति निर्माणमा सहयोग पुर्याउनेछ ।
तस्वीर : नेसनल योङ एकेडेमी नेपाल
