काठमाण्डौं – नोबल कोरोना भाइरस (कोभिड–१९)बाट बुधबार थप १ हजार ८१ जनामा संक्रमण पुष्टि भएको छ ।
देशका विभिन्न प्रयोगशालामा गरिएको परीक्षणमा थप १ हजार ८१ जनामा कोरोना संक्रमण पुष्टि भएको हो । यो सहित अब नेपालमा संक्रमितहरुको संख्या ४९ हजार २१९ पुगेको छ ।
स्वास्थ्य तथा जनसंख्या मन्त्रालयले आज गरेको नियमित पत्रकार सम्मेलनमा मन्त्रालयका प्रबत्ता डा.जागेश्वर गौतमले देशभरबाट संकलित ११ हजार १६७ जनाको पीसीआर परीक्षण गर्दा १ हजार ८१ जनामा संक्रमण पुष्टि भएको जानकारी दिए ।
उपत्यकामा ४६४ जनामा संक्रमण देखियो
काठमाण्डौं उपत्यकाका थप ४६४ जनामा संक्रमण पुष्टि भएको छ । जस मध्ये काठमाण्डौंमा ३९४ जना, ललितपुरका ३४ जना र भक्तपुरका ३६ जनामा संक्रमण पुष्टि भएको छ ।
यो सँगै काठमाण्डौंमा संक्रमितको संख्या ७ हजार ६११ पुगेको छ भने ललितपुरमा १ हजार ११ र भक्तपुरमा ८१८ पुगेको छ ।
संक्रमणबाट थप ६ जनाको मृत्यु
कोरोना संक्रमणबाट आज थप ६ जनाको मृत्यु भएको छ । यो सँगै नेपालमा कोरोनाबाट मृत्यु हुनेको संख्या ३१२ पुगेको छ ।