काठमाण्डौं – नोबल कोरोना भाइरस (कोभिड–१९)बाट बुधबार नेपालमा १ हजार १२० जनामा संक्रमण पुष्टी भएको छ ।
देशको विभिन्न प्रयोगशालामा गरिएको स्वाब परिक्षणका क्रममा थप १ हजार १२० जनामा कोरोना संक्रमण पुष्टी भएको हो । यो सहित अब नेपालमा संक्रमितहरुको संख्या ४१ हजार ६४९ पुगेको छ ।
स्वास्थ्य तथा जनसंख्या मन्त्रालयले आज गरेको नियमित पत्रकार सम्मेलनमा मन्त्रालयका प्रबत्ता डा.जागेश्वर गौतमले देशभरबाट संकलित स्वाब मध्ये १ हजार १२० जनामा कोरोना संक्रमण पुष्टि भएको हो ।
आज संक्रमित हुनेहरुमा ३२० जना महिला र ८०० जना पुरुष छन् ।
उपत्यकामा आज ३८८ जनामा संक्रमण
उपत्यकामा पछिल्लो २४ घण्टामा थप ३८८ जनामा कोरोना संक्रमण पुष्टि भएको छ । जस मध्ये काठमाण्डौंका ३५० जना, भक्तपुरका ९ जना र ललितपुरका २९ जनामा संक्रमण देखिएको पत्रकार सम्मेलनमा जानकारी गराईएको थियो ।
संक्रमणबाट थप १२ जनाको मृत्यु
संक्रमणबाट पछिल्लो २४ घण्टामा थप १२ जनाको मृत्यु भएको छ। योसहित ज्यान गुमाउनेको संख्या नेपालमा २५१ पुगेको हो । स्वास्थ्य तथा जनसंख्या मन्त्रालयका नेपालमा प्रतिघण्टा २ जना कोरोनाका कारण मृत्यु हुन थालेको जनाएको छ।
कहाँ कति थपिए संक्रमित ?
मन्त्रालयका अनुसार काठमाडौं उपत्यकामा ३८८ जना कोरोना संक्रमित थपिएका छन् । काठमाडौं जिल्लाका ३५०, ललितपुरका २९ र भक्तपुरका ९ जनामा कोरोना संक्रमण पुष्टि भएको हो ।
यस्तै सुनसरीका ७३ जना, धनुषाका ६३, मोरङका ५३, सर्लाहीका ५०, पर्साका ४९, चितवनका ४२, बाँकेका ४१, जुम्लाका ३७, महोत्तरीका ३१, रुपन्देहीका २७, कास्कीका २४, बाराका २३, कालीकोटका २१, लमजुङका १९, रौतहटका १८, नवलपुरका १६, सिराहाका १५, कैलालीका १३, झापाका ११ र बझाङका ९ जनामा पनि कोरोना संक्रमण पुष्टि भएको छ ।
दाङका ६ जना, बर्दियाका ५, तनहुँका ४ जना, भोजपुर, नवलपुर र कञ्चनपुरका ३/३ जना, ओखलढुंगा, धनकुटा, धादिङ, सिन्धुपाल्चोक, रामेछाप र प्युठानका २/२ जना तथा उलयपुर, खोटाङ, पाँचथर, काभ्रे, नुवाकोट सिन्धुली, गोरखा, पर्वत, स्याङ्जा, अर्घाखाँची, पाल्पा, रोल्पा, दैलेख, अछाम, डडेलधुरा र बैतडीका १/१ जनामा संक्रमण देखिएको मन्त्रालयले जनाएको छ ।