गोरखा – गोरखामा समुदाय स्तरमा कोरोना परिक्षणको थालनी गरिएको छ ।
गोरखा नगरपालिकाको स्वास्थ्य शाखाले पालिका भित्र बस्नेहरुको कोरोना परिक्षणको थालनी गरेको हो ।
पालिकाले पहिलो र दोस्रो चरण गरी ११८ जनाको स्वाब संकलन गरेर जिल्ला स्वास्थ्य कार्यालयमा बुझाएको स्वास्थ्य शाखा प्रमुख ईश्वर रेम्मीले बताए । ‘समुदाय स्तरमा कोरोना छ कि छैन भनेर स्क्रिनीङ गर्न थालिएको’ रेम्मीले बताए ।
पालिकाले पहिलो चरणमा गोरखा सदरमुकाममा ब्यवसायमा संलग्नहरु मध्ये सौन्दर्यकला ब्यवसायी र कपाल काट्ने नाईहरुको स्वाब संकलन गरेको थियो । भाद्र ९ गते (मंगलबार) सदरमुकामको समन्वय समितिको भवनमा गरिएको स्वाब संकलनमा त्यस्ता ब्यवसाय गरेका ७८ जनाको स्वाब संकलन गरिएको थियो ।
त्यस्तै गरी दोस्रो चरणमा गोरखा नगरपालिका १० को छेवेटार बजारमा भाद्र १० गते ४० जनाको स्वाब संकलन गरेको छ । छेवेटार बजारमा ब्यवसाय गरेर बस्ने ब्यवसयी, ग्यारेजमा काम गर्ने मजदुर र स्वास्थ्यकर्मीहरुको स्वाब संकलन गरिएको छ ।
दुवै स्थानबाट संकलित स्वाब जिल्ला स्वास्थ्य कार्यालय गोरखामा बुझाईएको गोरखा नगरपालिकाका स्वास्थ्य प्रमुख रेग्मीले जानकारी दिए ।
जिल्ला स्वास्थ्य कार्यालय गोरखाका सूचना अधिकारी राजुरमण न्यौपानेका अनुसार गोरखा नगरपालिकाले संकलन गरेको पहिलो चरणको ७८ जनाको स्वाब परिक्षणका लागि बुधबार राजधानी पठाईएको र दोस्रो चरणमा संकलित ४० जनाको स्वाब आज (बिहिबार) पोखरा पठाईएको जानकारी दिए ।
केही साता देखी ट्राभल हिस्ट्री नभएका केही ब्यत्तिहरुमा कोरोना संक्रमण देखि थाले पछि पालिकाले स्क्रिनीङका लागि स्वाब संकलन गर्न थालेको पालिकाको स्वास्थ्य शाखाले जनाएको छ ।
जिल्लामा हाल सम्म कोरोना संक्रमितको संख्या १२२ पुगेको छ । संक्रमित मध्ये आज सम्म कोरोना जितेर १२० जना घर फर्किसकेका छन् । २ जना गोरखा क्याम्पसको आइसोलेसनमा उपचाररत छने भने १ जना युवाको कोरोनाका कारण ज्यान गई सकेको छ ।