काठमाण्डौं – नोबल कोरोना भाइरस (कोभिड–१९)का कारण अन्तर्राष्ट्रिय उडानमाथि लगाएको प्रतिवन्ध भाद्र १६ गते देखी ८ वटा देशका हकमा फुकुवा गरेको छ ।
गत चैत १० गतेबाट बन्द भएको अन्तराष्ट्रिय उडान आउदो भाद्र १६ गते देखी मलेसिया, टर्की, दक्षिण कोरिया, जापान, चीन, हङकङ, यूएई र कतारका लागि प्रतिवन्ध खुल्ला गरिएको हो ।
संस्कृति, पर्यटन तथा नागरिक उड्डयन मन्त्रालयका अनुसार ति देशको उडान प्रतिवन्ध खुला गर्दै नियमित उडान तालिका तय गरेको हो ।
अन्तराष्ट्रिय उडानका लागि सरकारले पिसिआर परीक्षण सहज हुने देशलाई छनौट गरेको हो । यी देशबाट नेपाली नागरिक, कूटनीतिक नियोगका कर्मचारी, विकास साझेदारी संघ संस्थाका कर्मचारी तथा प्रतिनिधि सरकारी आमन्त्रणमा आउने व्यक्तिले मात्र नेपाल प्रवेशको अनुमति पाउनेछन् ।
ति देशमा जानका लागि सरकारले नेपाल एयरलाइन्सलाई १७ र हिमालयलाई १२ उडानको अनुमति दिएको छ । विदेशी वायुसेवा कम्पनीले भने ३१ वटा उडानको अनुमति पाएका छन् ।
भाद्र १६ गतेबाट भने चार्टर्ड उडानमा स्वदेशी वायुसेवा कम्पनीबाटै उडान हुने भएको छ । सम्बन्धित मुलुकले आफै पठाउने उडानको हकमा मात्र विदेशी कम्पनीले अनुमति पाएका छन् ।
सरकारले सेप्टेबर महिनाका लागि माल्दिभ्स, साउदी अरब, ओमान, कुवेत र कतारमा चार्टर्ड फ्लाइटका लागि उडान तोकेको हो । साउदी अरबको जेद्दा, दमाम र रियाद गरी तीन शहरमा जहाज जानेछन् ।
यता हिमालय एयरलाइन्सले १ महिनामा चुङछिङमा ४ उडानको अनुमति पाएको छ । चाइना साउदर्नले ग्वाङझाउ र एयर चाइनाले छेन्दुलाई काठमाण्डौं सिधा उडान गर्ने भएको छ । चाइनाको यी शहर कोरोनाबाट कम प्रभावित शहर हुन् ।
लामो दूरीका उडानमा दक्षिण कोरियाबाट कोरियन एयरले अनुमति पाएको छ । नेपाल एयरलाइन्सले जापानको नारिताका लागि उडानको अनुमति पाएको हो । टर्कीको इस्तानबुलबाट टर्की एयर नेपाल आउने आउने छ ।
