काठमाण्डौं – नोबल कोरोना भाइरस (कोभिड–१९)बाट नेपालमा आज थप ८५५ जनामा संक्रमण पुष्टि भएको छ ।
देशका विभिन्न प्रयोगशालामा गरिएको परीक्षणमा ८५५ जनामा कोरोना संक्रमण पुष्टि भएको हो । यो संगै नेपालमा कोरोना संक्रमितको संख्या ३३ हजार ५३३ जना पुगेको छ ।
स्वास्थ्य तथा जनसंख्या मन्त्रालयले आज गरेको नियमित पत्रकार सम्मेलनमा मन्त्रालयका प्रबत्ता डा.जागेश्वर गौतमले देशभरका विभिन्न प्रयोगशालामा ११ हजार ३२७ जनाको स्वाब परीक्षण गर्दा ८५५ जनामा कोरोना संक्रमण भएको जानकारी दिएको हो ।
संक्रमणबाट थप ७ जनाको ज्यान गयो
कोरोना संक्रमणबाट नेपालमा पछिल्लो २४ घण्टामा थप ७ जनाको ज्याज गएको छ । यो सहित नेपालमा कोरोना संक्रमणबाट ज्यान गुमाउनेको संख्या १६४ पुगेको मन्त्रालयले बताएको छ ।
उपत्यकामा २३२ जनामा संक्रमण देखियो
काठमाण्डौं उपत्यकामा मात्रै पछिल्लो २४ घण्टामा २३२ जना संक्रमण पुष्टी भएको पत्रकार सम्मेलनमा जानकारी गराईएको थियो । संक्रमित मध्ये काठमाण्डौंमा १९९ जना, भक्तपुरमा १४ जना र ललितपुरमा १९ जना संक्रमित थपिएको छ ।
पत्रकार सम्मेलनमा डा.गौतमले नेपालमा पछिल्लो २४ घण्टामा ३१३ जना डिस्चार्ज भएका छन् भने संक्रमित मध्ये हालसम्म १९ हजार ११९ जना निको भएर घर फर्किएको जानकारी दिए ।
त्यसैगरी आइसोलेशनमा १४ हजार २५० जना रहेका छन् । जस मध्ये होमआइसोलेशनमा ५ हजार ५७९ जना र संस्थागत आइसोलेशनमा ८ हजार ५८१ जना रहेका छन् ।
