गोरखा – गोरखाको बोर्लाङमा कोरोना संक्रमण बढ्न सक्ने भन्दै स्थानिय आफैले सक्रिय भएर आवतजावतमा निगरानी गर्न थालेका छन् ।
जिल्लाको भीमसेन थापा गाउँपालिका ७ को बोर्लाङ स्थित सिमलटार जलबिरेमा रहेको टोलसुधार समितिले टोल भित्र आउनेजानेको निगरानी गर्न थालेको हो ।
समितिको हालै बसेको बैठकले देशभर कोरोना संक्रमण फैलदै गएपछि टोलभित्र पनि त्यसको जोखिम बढेन सक्ने भन्दै आफ्नो टोलमा संक्रमित क्षेत्रबाट आउने र बाहिर जाने व्यक्तिहरुको पहिचान गरेर मात्र आवतजावत गर्न दिने निर्णय गरेको थियो ।
समितिले आजैबाट टोल क्षेत्र भित्र आउने र बाहिरने व्यक्तिहरुले अनिबार्य रुपमा पूर्व जानकारी गराउनु पर्ने निर्णय समेत गरेको समितिका सदस्य रञ्जित श्रेष्ठले बताए । आफ्नो टोलभन्दा बाहिरबाट आउनेहरुले जथाभावी गर्दा संक्रमण बढ्न सक्ने भएकोले निगरानी गर्न थालिएको समितिले जनाएको छ ।
टोलबासीलाई कोरोना संक्रमणबाट सुरक्षित राख्न र जनचेतना फैलाउन पनि यस्तो काम गरिएको हो । बैठकले कोरोना संक्रमित क्षेत्रबाट टोलभित्र प्रवेश गर्ने व्यक्तिहरु अनिबार्य रुपमा १४ दिन क्वारेन्टिनमा बस्नुपर्ने निर्णय समेत गरेको छ ।
नजिकिदै आएको चाडपर्व पनि टोल भित्रै बसेर सुरक्षित तबरले मात्र मनाउन समितिले अनुरोध गरेको छ ।
यस्तै मौका छोपेर जुवातास खेल्न सक्ने भएकोले समितिले टोल क्षेत्र भित्र पर्ने सिमलटार, जलबिरे, सुन्दरपुर लगायतका क्षेत्रमा जुवातास खेल्न समेत रोक लगाउने निर्णय गरेको अध्यक्ष भक्तबहादुर श्रेष्ठले बताए ।
