गोरखा समाचारदाता
गोरखा – जिल्लाको गण्डकी तथा शहिदलखन गाँउपालिमा प्रवलिकरण सम्वन्धी सचेतना कार्यक्रम सम्पन्न भएको छ ।
भारत सरकारद्धारा सहयोग प्राप्त नेपाल आवास पुनःर्निर्माण परियोजनाद्वारा गण्डकी र शहिदलखन गाँउपालिकामा प्रवलीकरण सम्बन्धी सचेतना कार्यक्रम सम्पन्न भएको हो ।
कार्यक्रममा सहभागि जनप्रतिनिधिहरुले प्रवलीकरण सम्बन्धी सचेतना मूलक कार्यक्रमलाई गाउँ स्तरमा लानुपर्ने बताएका थिए । उनीहरुले प्रवलीकरणको सूचीमा परेका घरहरुलाई यथाशीघ्र अगाडी बढाउन सबैले आ–आफ्नो क्षेत्रबाट पहल गर्नुपर्ने समेत बताए ।
कार्यक्रममा गण्डकी गाँउपालिकाका प्रमुख होमबहादुर रानामगरले पालिका भित्र निजीआवास पुनःर्निर्माण सम्पन्न हुने अवस्थामा रहेकाले प्रवलीकरणलाई तत्कालै अगाडी बढाउन जरुरी रहेको बताए ।
यस्तै गरी शहिद लखन गाँउपालिकाका प्रमुख रमेशबाबु थापा मगरले प्रवलीकरणका लागि पालिकाको तर्फबाट सहयोग गर्ने हुने बताए । उनले नेपाल आवास पुनःर्निर्माण परियोजनाको प्रवलीकरण सम्बन्धी तालिम सञ्चालन गरेर स्थानीय डकर्मीको क्षमता अभिवृद्धि गरेको बताए । थापाले प्रवलीकरण सम्बन्धी सचेतना मूलक कार्यशालाले सरोकारवाला निकायको क्षमता अभिवृद्धिमा सहयोगी भूमिका निर्वाह गर्ने बताए ।
कार्यक्रममा गण्डकी गाँउपालिकाकी उपाध्यक्ष ललिता अधिकारी, डिएलपीआईयु भवनका ईन्जिनियर एवम् सूचना अधिकृत युवक श्रेष्ठ, परियोजनाका संयोजक राम सापकोटा, परियोजनाका इन्जिनियर दिवस दाहाल, परियोजनाकै सामाजिक विज्ञ घनश्याम खतिवडाले प्रवलीकरण सम्बन्धी स्थानीय डकर्मीलाई क्षमता अभिवृद्धि गर्न सकेको खण्डमा प्रवलीकरण सम्बन्धी जनचेतना फैलाउन सहज हुने विश्वास ब्यक्त गरे ।
परियोजनाले गोरखाको सिरानचोक, धार्चे, आरुघाट र अजिरकोटमा समेत प्रवलीकरण सम्बन्धी अन्तरक्रिया गर्ने कार्यक्रम तय भएको आयोजनाका सूचना अधिकारी तारा ढकालले बताईन ।
