गोरखा समाचारदाता
गोरखा – बिनाशकारी भूकम्प लगत्तै निर्माण भएका तर सरकारी मापदण्ड पुरा नभएका जिल्ला भित्रका घरहरुको सुधार कार्य भई रहेको छ ।
राष्ट्रिय पुनःर्निर्माण प्राधिकरणले तोकेको न्युनतम मापदण्ड पुरा नगरेका घरहरुलाई अहिले भारत सरकार द्धारा सहयोग प्राप्त नेपाल आवास पुनःर्निर्माण परियोजनाका प्राविधिकको सहजिकरणमा सुधार काय भई रहेको हो ।
अहिले गाोरखाको २ नगरपालिका तथा ६ गाँउपालिकामा त्यस्तो कार्यहरु भई रहेको आयोजनाका गोरखा कार्यालयका सूचना अधिकारी तारा ढकालले जानकारी दिईन । परियोजनाले २६ हजार ९१२ घर मध्ये १७५ पहिचान भएकामा ३२ वटा घरमा सुधार कार्य सम्पन्न गरिसकेको छ । उक्त घरहरुमा परियोजनाको प्रत्यक्ष सहभागितामा सुधार कार्य सम्पन्न गरिएको वरिष्ठ इन्जिनियर सन्तोष लामाले बताए ।
यस्तै भूकम्प प्रभावित घरधनी तथा परियोजनाका प्राविधिकको सहजिकरण मार्फत सामान्य सुधार सम्पन्न गरि ८१ जना घरधनीले किस्ता प्राप्त गरिसकेको परियोजनाले जनाएको छ । बाँकी ९४ घरमा भने सुधार कार्य भई रहेको इन्जिनियर विरेन्द्र श्रेष्ठले बताए ।
बन्धन नभएका, कोठा मापदण्ड भन्दा ठूला भएका, आकार नमिलेका, झ्याल ढोकाको आकार तथा मापदण्ड भन्दा ठूला तथा उचित स्थानमा नभएका अधिकाशं घरमा मर्मत गरिएको परियोजनाले जनाएको छ ।
परियोजनाले गोरखा र पालुंगटार नगरपालिका एवम् धार्चे, शहिद लखन, गण्डकी, सिरानचोक, अजिरकोट र आरुघाट गाँउ पालिकामा भूकम्प प्रभावितहरुको घर पुनःर्निर्माणका लागि सम्बन्धित पालिका संगको समन्वयमा सामाजिक प्राविधिक सहजिकरण गरिरहेको छ ।
