गोरखा समाचारदाता
काठमाडौं – गत मंसिर २८ गते बुढानिल्कण्ठ नगरपालिका–५ बसपार्क नजिकै भएको कार दुर्घटनामा परी गोरखा बारपाक सुलिकोट–८ जराङकी लिला देवकोटाको ज्यान गयो । मादक पदार्थ सेवन गरेर चार जना सवार बा १४ च ६१२३ नम्बरको गाडीले पेटीमा हिँडिरहेकी देवकोटालाई किचेको थियो ।
दुर्घटनाका बारेमा सोधपुछ गर्दा पनि प्रहरीले उक्त गाडीमा सवार चार जना मध्ये तीन जनाको मात्र नाम खुलाएको थियो । जसमा चालक पृथ्वी मल्ल, यात्रुहरुमा करिश मास्के र एलिना थापाको नाम मात्र प्रहरीले बतायो । तर, चौथो व्यक्ति को थिए भन्ने प्रहरीले खुलाउनै मानेन ।
घटनाको २५ दिनपछि चौथो व्यक्तिको नाम बाहिरिएको छ । उक्त गाडी नायिका एवं मोडल परमिता राणा समेत रहेको खुलेको हो । सामाजिक सञ्जाल फेसबुकमा एक लामो स्टाटस लेख्दै परमिताले उक्त गाडीमा आफू पनि रहेको स्वीकार गरेकी छिन् । घटनापछि सामाजिक सञ्जालमा पनि परमिता हुन सक्ने चर्चा चलेको थियो ।
परमिताले आफूले बल्ल यो कुरा खुलासा गर्ने हिम्मत जुटाएको भन्दै उक्त घटनामा माफी मागेकी छिन् । ‘सर्वप्रथम म सबैसँग माफी माग्न चाहन्छु । चार जना मानिसले लिएको एक मूर्खतापूर्ण निर्णयले एक निर्दोषको ज्यान गयो,’ उनले लेखेकी छिन्, ‘यो सत्य नहोस् र यो सपना मात्र होस् भन्ने कामना गरे पनि उक्त कार भित्र म पनि एक यात्रु थिएँ । म अझै पनि उक्त घटनाले स्तब्ध छु । माफी माग्नमा ढिलाइ गरेकोमा मनदेखि माफी क्षमा चाहन्छु । मप्रति जनताले देखाएको आक्रोशलाई बुझ्छु ।’
चार सन्तानले आफ्नो प्रिय आमा र एक पतिले आफूलाई साथ दिने पत्नी गुमाएको भन्दै हरेक विहान आफ्नो हृदय र आत्मामा पीडा र शोक लिएर ब्युझने कुरा भगवानलाई मलाई थाहा भएको उल्लेख गरेकी छिन् । ‘अब म कहिल्यै पहिलेको जस्तो व्यक्ति हुनसक्दिनँ,’ उनले लेखेकी छिन् ।
‘मापसे गरेर गाडी चलाउनु विकल्प नभएर र आफू र अरुलाई सुरक्षित राख्ने मैले चाँडै बुझ्नुपथ्र्यो । मेरो जीवनको हरेक पलमा मलाई मारिरहने छ कि एउटा निर्दोषको ज्यान गएको छ । मैले यो पीडा जीवन भर लिएर बाँचनुपर्छ ।’
परमिताले आफूले पनि आफ्नो पितालाई कार दुर्घटनामा गुमाएको बताउँदै आफूलाई आमाले हुर्काएको र परिवारको सदस्य साथमा नहुनुको पीडा आफूलाई थाहा भएको पनि बताएकी छिन् । समाज आफ्नो हैसियत जे भए पनि आफू अन्त्यमा सामान्य मानिस भएको र आफूलाई पनि डर लाग्ने बताएकी छिन् । दुर्घटना भएपछि आफूलाई के गर्ने थाहा नभएको र केही समय कारभित्रै स्तब्ध भएर बसेको र पछि साथीहरुले कारबाट तानेर ‘यहाँ बाट जाऊ’ भनेर भनेको पनि बताएकी छिन् ।
केही समय आफू बाटो पारी सडकको पेटीमा बसेको र स्थानीयहरुले सोध्दा आफू पनि कारमा रहेको भनेर खुलाएको बताएकी छिन् । सामाजिक सञ्जालमा आफूबारे आएको सन्देश देखेर आफू हरेक दिन र रात रुने गरेको राणाले बताएकी छिन् । घटनापछि परिवारको वकिलले नै आफ्नोबारे नकरात्मक कमेन्ट गर्नेलाई ब्लक गर्न सुझाव दिएको र उनले भने अनुसार आफूले अरुलाई ब्लक गरेको खुलाएकी छिन् ।
कारको ठक्करबाट कम्मरमाथिको भागमा ठूलो चोट लागेकी लिलालाई नजिककैको न्यूरो अस्पतालमा ल्याइएको थियो । तर, उनलाई चिकित्सकहरुले त्यतिबेलै मृत घोषित गरिदिएका थिए ।
पस्मिना उद्योगमा काम गर्ने लिलाको मृत्युको खबर सुनेलगत्तै उनका मजदुर साथीहरु र आफन्तहरु न्युरो अस्पतालमा जम्मा भएका थिए । प्रहरीले हतारहतार शवको मुचुल्का उठाउन र जाहेरी दिन दबाब दिएको थियो । तर पीडित पक्षले पहिले पीडकको परिवारसँग यो गम्भीर लापरवाहीबारे छलफल गर्न चाह्यो ।
पीडित पक्षका मानिसहरु न्यूरो अस्पतालमा रहेकै बेला महाराजगञ्ज बृत्तको हिरासतका दुवैका लागि परिवारले लुगासहितका सामान छाडेर गएका थिए । त्यसपछि प्रहरी बृत्त पुगेका लिलाका आफन्तको दबाबपछि मात्रै प्रहरीले मल्ल र मास्केका परिवारलाई बोलाएको थियो ।
