गोरखा समाचारदाता
चितवन/सौराह – चितवनको सौराहामा चलिरहेको १६औँ चितवन हात्ती महोत्सवमा हात्ती र माउतेलाई वनभोज खुवाउने काम समपन्न भएको छ ।
महोत्सवको कार्यक्रममध्ये नै हात्तीको वनभोजलाई निकै आकर्षक मानिदै आएको छ । क्षेत्रीय होटल सङ्घ सौराहा चितवनका अनुसार वनभोजमा ८५ वटा हात्ती सहभागी भएका थिए । वनभोजमा हात्तीलाई मनपर्ने खानेकुराहरु दिएर बन भोज खुवाउने गरिन्छ ।
हात्तीहरुलाई एकै ठाउँमा जम्मा गरी उनीहरुलाई मनपर्ने फलफूल, काचो तरकारी, उखु, फर्सी, गाजर, सुन्तला तथा भेलीको बिशेष परिकारबाट तयार पारीएको चामलको ढल्लो खान दिइएको थियो।
बनभोजमा चितवन राष्ट्रिय निकुञ्ज र निजीरूपमा पालिएका हात्तीहरु र हात्तीका माउतेहरु सहभागी भएका थिए । हात्तीको बनभोज हेर्न देश तथा विदेशबाट समेत मानिसहरु आईपुगेका थिए ।
बाघमारा सामुदायिक वनको चौरमा भई रहेको हात्ती महोत्सव शुक्रबारसम्म सञ्चालन आउने छ ।
महोत्सवमा हात्ती ‘फास्टवाक’ प्रतियोगिता, हात्तीका छावाहरुको फुटबल प्रतियोगिता, हात्ती सुन्दरी प्रतियोगिता, हात्तीपोलो, हात्ती पेन्टिङ प्रतियोगिता भई सकेको छ ।
