गोरखा समाचारदाता
गोरखा – हाम्रो प्यारो नेपाल नामक संस्थाले गोरखा नगरपालिका १० बिरेञ्चोकका विद्यार्थी र स्थानीयलाई सिपमुलक तालिम दिएको छ । रत्नराज्य लक्ष्मी माविमा अध्ययनरत विद्यार्थी र अभिभावकलाई डूाइभिङ तथा ४ महिने ब्यूटिसियन तालिम दिएको हो ।
गत जेठदेखि सुरु भएको तालिमको आइतबार एक कार्यक्रमका बिच समापन गरिएको छ । ७ जना विद्यार्थी र १३ जना अभिभावकले डूाइभिङको तालिम लिएका थिए भने ८ जना विद्यार्थी र १० जना अभिभावकले ब्यूटिसियनको तालिम लिएका थिए ।
विद्यालय ब्यवस्थापन समितिका अध्यक्ष धनबहादुर आलेको अध्यक्षतामा भएको समापन कार्यक्रममा गोरखा नगरपालिकाका प्रमुख राजनराज पन्तको प्रमुख आतिथ्यता रहेको थियो । कार्यक्रममा संस्थाका संस्थापक अध्यक्ष डा. कपिल रिजाल र जिवप्रसाद ओलीको समेत सहभागिता रहेको थियो ।
त्यस्तै संस्थाले सिरानचोक गाउँपालिका २ को थालाजुङमा रहेको आहाल भञ्ज्याङ्ग माविमा अध्ययनरत बिद्यार्थीहरुलाई न्यानो कपडा वितरण गरेको छ ।
विद्यालयमा अध्ययनरत १ सय ३० जना बिद्यार्थीहरुलाई संस्थाले स्विटर वितरण गरेको हो । शिशु कक्षा देखी १० सम्म अध्ययन गर्ने बिधार्थीहरुलाई संस्थाले कपडा वितरण गरेको प्रधानाध्यापक केशरसिं बस्न्यातले बताए । बितरण गरीएको स्विटर ९० हजार रुपैयाँ बरावरको रहेको संस्थाले जानकारी जनाएको छ ।
