मोहसिन अलि मिया
गोरखा – गोरखा नगरपालिका ११ को एक सहकारीले स्थानीय विद्यालय नै बन्द गराएर आफ्नो साधारण सभा सम्पन्न गरेको छ । गत बैशाखमा स्थापना भई असोजमा मात्रै दर्ता भएको तारानगर साना किसान तथा कृषि सहकारी संस्थाले प्रारम्भिक साधारण सभा आयोजना गर्न सोही वडा स्थित तेह्रकिलोमा रहेको चन्द्रज्योती आधारभुत विद्यालय नै बन्द गराएको खुलेको छ ।
गोरखा नगरपालिकाको शिक्षा शाखा एवं विद्यालय प्रशासनसंग अनुमती नै नलिई सहकारीले स्कुल प्राङगढमा सभा आयोजना गरेको बताइएको छ । ‘कार्यक्रम गर्न स्थलका बारेमा मसंग सहकारीका सदस्यहरुले सल्लाह गर्नुभएको हो तर हामीले अनुमती दिएका होइनौ’ विद्यालयका प्रधानाध्यापक प्रतिशा अधिकारी कुवँरले भनिन् ‘छलफलका क्रममा मैले विद्यालयमा हुदैन अन्तै गर्नुस भनेको, उहाँहरुले जबरजस्ती विद्यालयमै गर्नुभयो ।’
गोरखा नगरपालिकाले निर्माण गरेको नगर शिक्षा ऐन २०७४ ले विद्यालय खुलेको दिन कुनैपनि संघसंस्थालाई सार्वजानिक कार्यक्रम आयोजना गर्न रोक लगाएको छ । विदा भएका बेला समेत अनुमती नलिई कार्यक्रम गर्न नपाइने ऐनमा उल्लेख भएपनि सहकारीले त्यसको उल्लंघन गर्दै विद्यालय खुलैकै दिन प्रांगढमा साधारण सभा आयोजना गरेको छ ।
‘विद्यालयमा पढाई थिएन, जाँच सकेर बिदा थियो, अन्य ठाउँमा पायक नपरेकाले हामीले विद्यालयमै कार्यक्रम गरेका हौ’ सहकारीकी अध्यक्ष चञ्चला ज्ञवालीले भनिन् । विद्यालयसंग सल्लाह गरेपनि लिखित अनुमती भने नलिइएको स्विकार्दै उनले भनिन् ‘यस बिषयलाई धेरै अतिरञ्जित बनाउनु उपयुक्त होइन ।’
आइतबार परिक्षा सकेको विद्यालयले सोमबार कापी जाँच गर्नका लागि विद्यार्थीलाई भने विदा दिएको थियो । तर सहकारीको कार्यक्रमले कापी जाँचमा समेत बाधा भएको विद्यालय स्रोतको भनाई छ ।
‘सहकारीको कार्यक्रम छ भनेर धेरै सरहरु त स्कुलै आउनु भएन’ एक शिक्षकले भने ‘आएकाले पनि काम गर्न पाएनन्, दिनभरी कार्यक्रम सुनेर फर्कियौ ।’ यता वडाध्यक्ष रामबहादुर खड्का भने यस बिषयमा आफुलाई कुनै जानकारी नभएको बताउछन् । बिरामी भएकाले कार्यक्रममै उपस्थित नभएको उनको भनाई छ ।
त्यस्तै नगर शिक्षा शाखा भने विद्यालय खुलेको दिन कुनै पनि संस्थाले कार्यक्रम गर्न नपाउने बताउछ । नगरपालिकाले प्रकाशित गरेको शैक्षिक क्यालेण्डरमा समेत सोमबार बिदा नभएको शाखा बताउछ ।
‘नगरभरीका स्कुल हामीले निकालेको क्यालेण्डर अनुसार चल्ने हो, सोमबार कुनै विदा छैन’ शाखा प्रमुख बाबुराम बरालले भने ‘विदाको दिन कार्यक्रम गर्न पनि अनिबार्य स्विकृती लिनुपर्छ, खुलेको दिन त कार्यक्रम गर्नै पाइदैन ।’ विद्यालयमा सहकारीले कार्यक्रम आयोजना गरेको बारे हालसम्म आफु अनभिज्ञ रहेको शाखा प्रमुख बरालले बताए । ‘कार्यक्रमका बारे स्कुलले पनि हामीलाई जानकारी गराएको छैन, के भएको हो म बुझ्छु’ उनले भने ।
झण्डै ६ सय सदस्य रहेको सो कृषि सहकारीले नियम मिच्दै विद्यालयमा गरेको साधारण सभाको उद्घाटन भने गण्डकी प्रदेशका कृषि सहकारी तथा भुमि ब्यवस्था मन्त्री लेखबहादुर थापाले गरेका थिए । विद्यालय बन्द गराएर सहकारीले कार्यक्रम आयोजना गरेको छ भन्ने मन्त्री थापालाई कसैले सुइको समेत दिएनन् ।
यता कार्यक्रममा सहभागी हुन पुगेका गोरखा नगरपालिका प्रमुख राजनराज पन्त भने कार्यक्रम सुरु हुनुअघि नै बाहिरीएका थिए । सहकारीले विद्यालय बन्द गराएर साधारण सभा आयोजना गरेको थाहा पाएपछि प्रमुख अतिथी समेत रहेका मन्त्री थापा आउनुअघि नै पन्त कार्यक्रम स्थलबाट कार्यालय फर्केका थिए ।