गोरखा समाचारदाता
गोरखा – गोरखाको भिमसेन थापा गाउँपालिकाको बोर्लाङमा १०३ जना महिलाले स्वास्थ्य परिक्षण गराएका छन ।
भिमसेन थापा गाउँपालिका र समाज विकास सहयोग नामक संस्थाको आयोजनामा वडा नम्बर ७ को बोर्लाङमा भएको स्त्रीरोग सम्बन्धी निशुल्क स्वास्थ्य परिक्षण तथा पाठेघरको मुखको क्यान्सर सम्बन्धी शिविर भएको हो ।
भिमकुल बचत तथा ऋण सहकारी संस्था लिमिटेडको सहयोगमा शिविर बिहान ८ बजेदेखि अपरान्ह्र ४ बजेसम्म सञ्चालन भएको थियो । वडा भित्रका सवै टोलका महिलाहरुलाई शिविरमा ल्याउन र स्वास्थ्य परिक्षण गराउन गाउँपालिकाले निशुल्क यातायातको समेत सुबिधा दिएको थियो ।
स्वास्थ्य परीक्षण गराएका मध्ये ४ जना महिलाको पाठेघरको शल्यक्रिया गर्नुपर्ने भएकाले निशुल्क शल्यक्रियाका लागि सिफारिस गरिएको गाउँपालिकाको कार्यालयले जानकारी दिएको छ । शिविरमा बिशेषज्ञ चिकित्सक, स्वास्थ्यकर्र्मी, महिला स्वास्थ्य स्वयमसेविका लगायतले बिरामीहरुको स्वास्थ्य परीक्षण गराएका थिए ।
