गोरखा समाचारदाता
गोरखा – थालाजुङमा भएको निशुल्क स्वास्थ्य शिबिर सकिएको छ ।
सिरानचोक गाउँपालिका वडा नम्बर २ थालाजुङको समन्वय र कादुरी एग्रिकल्चर एण्ड एसोसियसनको आयोजनामा भएको ४ दिने शिबिरमा १ हजार ९३ जनाले स्वास्थ्य जाँच गराएका छन् । ‘रोग लुकाएर बस्नुभएका आमा बुबा दाजुभाई दिदि बहिनीहरु उपचारका लागि आउनुभयो’ वडा अध्यक्ष ज्ञानेन्द्र गुरुङले भने ‘आँखा, दाँत र महिलाहरुको आङ खस्ने रोगका बढि बिरामी भेटिए ।’ शिविरमा उपचार गराउन आउने मध्ये महिलाको संख्या बढि थियो । ४३० जना पुरुषले जाँच गराएको उक्त शिविरमा ६६३ महिलाहरु आफ्नो स्वास्थ्य जाँच गराएका थिए ।
शिविरमा स्त्री रोग सम्बन्धि जाँच तथा उपचार, आँखा जाँच तथा शल्यक्रिया, दाँतको उपचार, अन्य सामान्य स्वास्थ्य जाँच तथा उपचार र निशुल्क परामर्श तथा औषधी वितरण समेत गरिएको उनले बताए । उक्त शिविरमा ४८८ जनाले आँखा जाँच गराएकोमा ३० जनाको मोतिबिन्दु निशुल्क शल्यक्रिया गरिएको छ ।
यसैगरी स्त्री रोग सेवा लिएका २०७ महिला मध्ये ६ जनाको पाठेघरमा रिङ राखिएको वडा अध्यक्ष गुरुङले बताए । यसैगरी ३९६ जनाले दन्त सेवा लिएका छन् । ती मध्ये ८७ जनाको दाँत उखेल्नुका साथै २० जनाले किराले खाएको ठाउँमा सिमेन्ट भएका हुन् । ‘स्त्री रोगमा हामी अलि बढि फोकस थियौं, धेरै महिलाहरुको आङ खस्ने रोगको स्किनिङ गर्ने काम भयो’ उनले भने ‘परम्परागत रुढीबादी मान्यताले होला आमा दिदि बहिनीहरु खुल्नु सक्नु भएन तर समग्रमा शिविर राम्रो भयो ।
शिविरमा सिरानचोक गाउँपालिका वडा नम्बर १ केरावारी, २ थालाजुङ, ३ हर्मी, ४ र ५ छोप्राकका साथै, गाँखु श्रीनाथकोट र अजिकोट गाउँपालिकाका विभिन्न स्थान र छिमेकी जिल्ला लम्जुङबाट समेत बिरामी आएको आयोजकले दावि गरेको छ । यसैविच सिरानचोक गाउँपालिकाले आफूसँग मौज्जाद स्वास्थ्यकर्मी परिचालन गरी विभिन्न ठाउँमा निशुल्क स्वास्थ्य शिविर गर्दै आइरहेको छ ।
