मोहसिन अलि मियाँ
गोरखा – गोरखा बजार आसपासका वडाहरुमा रहेका अधिकांश पसलहरु दर्ता विनै सञ्चालनमा रहेको पाइएको छ ।
गोरखा नगरपालिकाको नेतृत्वमा भएको बजार अनुगमनका क्रममा अधिकांश पसलहरु कुनै पनि निकायमा दर्ता नै नगरी चलेको पाइएको हो ।
गोरखा नगरपालिकाको वडा नम्बर १, २, ४, ६ र ८ का केहि साना बजारहरुमा मंगलबार अनुगमन गरिएको थियो । ‘हामीले नियमित रुपमा बजार क्षेत्रलाई लक्षित गरि अनुगमन गरिरहेका छौ’ गोरखा नगरपालिकाका प्रशासकिय अधिकृत चेतप्रसाद अम्गाईले भने ‘अबको तार्गेट मुख्य बजार मात्रै होइन, वडाहरुका साना पसलहरु पनि छन्, त्यसैको सुरुवात वडा नम्बर १ वाट गरयौ ।’
अनुगमनका क्रममा अधिकांश पसलहरु दर्ता नभएको, मुल्यसूची नराखेको, म्याद गुर्जेका सामान राखेको, बोर्ड नराखेको, होटल तथा रेष्टुरेण्ट सफा नभएको भेटिएको अम्गाईले बताए । ‘आज हेरेको ४७ वटा मध्ये अधिकांशले दर्ता नगरेको भेटियो’ उनले भने ‘केहिले दर्ता त गरेको तर नविकरण नगरेको, दर्ता गर्नुपर्ने सबै निकायमा नगरेको पनि छन् ।’
त्यस्ता पसल तथा फर्महरुलाई नगरपालिकाले २ हप्ताको म्याद दिई दर्ता प्रकृयामा जान समय दिएको जनाएको छ । ‘यो पहिलो सुरुवात हो, आज दर्ता नभेटिएकालाई सचेत गराएर हामीले १५ दिनको समय दिएका छौ, त्यसपछिको अनुगमनमा पनि उस्तै भेटिए हामी कारबाही प्रकृयमा जान्छौ’ अम्गाईले भने ।
तर पसलका सञ्चालकहरु भने दर्ता प्रकया झण्झटिलो भएका कारण ढिलाई भएको बताउछन् । ‘दर्ता नै नगरी पसल चलाउने मनसाय हाम्रो पनि होइन, दर्ता गर्न गयो प्रकया नै झण्झटिलो छ, के के हो कागजात पुरयाउनुपर्ने’ कोखे आहालेका एक ब्यापारीले भने ‘हामी जस्ता गाउँका साना ब्यापारीलाई सबै कुरा मेसो पनि नहुने ।’ वडा कार्यालयले गाउँका पसलहरुको दर्ता प्रकृया ब्यवहारिक रुपमा सहज बनाउनुपर्ने उनिहरुको माग छ ।
वडा नम्बर १ को स्याम बजार, कटुसघारी, २ को कोखेआहाले बजार, ४ को फिनाम, ८ को आहाले र ६ को घ्याम्पेशाल बसपार्क वरपरका पसलमा गरिएको अनुगमनका क्रममा झण्डै ९० प्रतिशतभन्दा बढी मापदण्ड विपरित चलेको पाईएको हो ।
४७ पसलमध्ये २ वटा मासु पसल, ३१ वटा किराना, ११ वटा होटल, एउटा औषधी पसल र अन्य खुद्रा २ वटा पसलमा अनुगमन गरिएको थियो । अनुगमनका क्रममा जिल्ला प्रशासन कार्यालय, जिल्ला प्रहरी कार्यालय, नेपाल खाद्ध संस्थान, गोरखा उद्योग बाणिज्य संघ लगायतका निकायका प्रतिनिधीको सहभागिता रहेको थियो ।
