गोरखा समाचारदाता
गोरखा – जिल्लाको २ वटा प्रहरी चौकी आज (सोमबार) उदघाट्न गरीएको छ ।
०७२ सालको बिनाशकारी भूकम्पले क्षति पुरयाएको मध्ये २ वटा चौकी पुनःनिर्माण सम्पन्न भए पछि उदघाट्न गरीएको हो ।
गण्डकी प्रदेश प्रहरी प्रमुख डिआइजी बिनोद शर्मा घिमिरेले सिरानचोक गाउँपालिका–३ को इलाका प्रहरी कार्यालय हर्मी र पालुङटार नगरपालिका–९ को रातमाटेमा रहेको प्रहरी चौकी भवनको उद्घाटन गरेका हुन् ।
निर्माण भएको मध्ये १ करोड ९३ लाख ६९ हजार लागतमा इप्रका हर्मीको भवन निर्माण भएको हो भने १ करोड ५५ लाख ७४ हजार लागतमा रातमाटे प्रहरी चौकी निर्माण भएको जिल्ला प्रहरी कार्यालयका प्रहरी उपरिक्षक ओमप्रसाद अधिकारीले जानकारी दिए ।
हमीको भवन २०७४ साल साउन २२ गते र रातमाटेको भवन ‘२०७४ साल बैशाख ६ गतेबाट निर्माण थालिएको थियो । रातमाटे प्रहरी चौकी निर्माणका लागी स्थानीय पदम प्रसाद अधिकारीले निशुल्क जग्गा उपलब्ध गराएका थिए । अधिकारीलाई आजै डिआइजी बिनोद शर्मा घिमिरेले सम्मान समेत गरेका थिए ।
भवन उद्घाटन कार्यक्रममा बोल्दै गण्डकी प्रदेश प्रहरी प्रमुख डिआइजी घिमिरेले प्रहरी संगठनमा आवश्यक स्रोत साधन र प्रविधि नहुँदा समस्या भएको बताए थिए । सिमित स्रोत साधनका बावजुद पनि शान्ति सुरक्षा कायम राख्न प्रहरी दिन रात खटिएको उनले बताए ।
