गोरखा समाचारदाता
डडेल्धुरा – अनसनरत डा.गोबिन्द केसीलाई लिन डडेल्धुरा आएको नेपाली सेनाको हेलिकप्टर त्यसै फर्किएको छ ।
डा. केसीले आफु ठिक भएको भन्दै काठमाडौं जान अस्वीकार गरेपछि उनलाई लिन गएको नेपाली सेनाको हेलिकप्टर त्यसै फिर्ता भएको हो ।
गृह मन्त्रालय मार्फत जिल्ला प्रशासन कार्यालय डडेल्धुराले मगाएको नेपाली सेनाको हेलिकप्टर डा.केसीलाई लिन बिहानै डडेल्धुरा आई पुगेको थियो ।
डा.केसीको स्वास्थ्य अवस्था गंभिर भएको भन्दै डडेल्धुरा अस्पतालका मेसुले सुविधासम्पन्न अस्पतालमा उपचार गराउनु पर्ने बताएका थिए । सेनाको हेलिकप्टर डडेल्धुरा पुगेपछि सोमबार विहान डा.केसीका समर्थक र प्रहरीबीच तनाव सिर्जना हुनुका साथै बजार समेत पुर्ण रुपमा बन्द भएको थियो ।
डा.केसीले अस्पतालले आफूलाई नसोधेर विज्ञप्ति प्रकाशन गरेकोप्रति आपत्ति समेत जनाएका छन् । उनले मेसु डा.जितेन्द्र कँडेलसंग असन्तुष्टि पोख्दै आफु यहाँबाट कही नजाने भन्दै आफु आफ्नो उपचारको लागि भन्दा पनि जनताको अधिकारको लागि अनसन बसेको बताए ।
आक्रोशित डा.केसीले सञ्चारकर्मीहरु संग ओलीको गुण्डागर्दी नचल्ने भन्दै आफुले राखेका मागहरु पूरा गरोस् म अनसन तोडेर आफैं काठमाडौं जान्छु भने ।