मोहसिन अलि मिया
गोरखा – गोरखा चेम्बर अफकमर्सले झुक्याएको जिल्ला फुटबल संघ (एन्फा) ले आरोप लगाएको छ ।
दोस्रो दशैं सस्तो मेला आयोजना स्थल प्रयोग गर्ने विषयमा दुई पक्ष वीच भएको सहमतीलाई उल्लंघन गर्दै चेम्बरले झुक्याएको एन्फाको भनाई छ । ‘हामीले रंगशालालाई ग्रासुट प्रशिक्षण मैदानका रुपमा विकास गर्ने उदेश्यले ६ लाख लगाएर पूरै १० फिटको तारजाली लगाएका थियौ’ संघका गोरखा अध्यक्ष दिपेन्द्र श्रेष्ठले भने ‘मेलागर्न स्थलको विकल्प नभएपछि हामीले केहि ब्यवहारिक सर्त राखेर लिखित सहमती सहित मैदान दिन बाध्य भयौ, अहिले चेम्बरले सहमती लत्यायो ।’
मेला आयोजना हुनु अघि संघको पहलमा हरमटारीमा रहेको खेलकुद मैदान तारजालीले घेरिएको थियो । चेम्बरले तारजाली हटाएर मेला आयोजना गर्ने र संघले खर्च गरेको ६ लाख रुपैया भुक्तानी गर्ने भनि भदौं २६ गते ४ बुदें लिखित सहमती बनेको थियो ।
सहमती भएकै दिन चेम्बरले संघलाई राष्ट्रिय बाणिज्य बैंक गोरखा शाखाको चेक असोज २० गतेको मिति राखेर दिए पनि एक महिना बित्दा समेत चेक नसाटिएको उनको भनाई छ । संघलाई तारजाली र मैदान संरक्षण गर्न गोरखा नगरपालिकाबाट ५ लाख र एन्फा केन्द्रिय कार्यालयको ५ लाख गरी १० लाख रकम बिनियोजन भएको थियो ।
तर सम्झौता अनुसार काम सम्पन्न नभएकाले दुवै निकायले संघलाई दिने रकम समेत रोकेका छन् । ‘एन्फा र गोरखा नगरपालिकाबाट गरी १० लाख आउने भनेर हामीले आफ्नो लगानीमा सबै घेराबार गरयौ, अहिले बनाएको संरचना पनि बिग्रियो’ अध्यक्ष श्रेष्ठले भने ‘काम पूरा नभएपछि दुवै निकायबाट आउने रकमपनि रोकिएको छ ।’
सहमतीपत्रमा मेला सकिएपछि पोल, तारजाली पूरानै स्वरुपमा चेम्बरले निर्माण गरिदिने, संघले हालसम्म मैदानमा खर्च गरेको ६ लाख रुपैया चेम्बरले बुझाउने उल्लेख छ । त्यस्तै गोरखा नगरपालिकाबाट ५ लाख संघलाई प्राप्त भएपछि संघले चेम्बरलाई सो रकम बुझाउने समेत सहमती बनेको थियो । ‘हामीलाई एक महिना अघिको मिति राखेर दिएको चेक को खातामा रकम छैन’ संघका अध्यक्ष श्रेष्ठले भने ‘अब केहि दिन कुर्छौ, भएन भने संघ कानुनी प्रकृयामा जान बाध्य हुन्छौ ।’
यता चेम्बरका अध्यक्ष भाइचन्द्र श्रेष्ठ भने सहमती उल्लंघन नगरेको दावी गर्छन् । रकम उठ्न बाँकी रहेकाले चेक काटिएको मितिमा संघलाई रकम दिन भने नसकिएको उनले स्विकारेका छन् । ‘स्टल वापतको रकम आउन बाँकी छ, त्यै भएर ढिलो भएको हो’ उनले भने ‘तर सहमती दुवै पक्षबाट पालना हुनुपर्छ, एकतर्फी मात्रै हुदैन ।’ गोरखा नगरपालिकाबाट आउने भनिएको रकम संघले चेम्बरलाई नदिए सम्म चेम्बरले दिने भनिएको रकम समेत दिन नसकिने बैठकबाट निर्णय भएको उनले बताए । ‘हामीले मात्रै दिने भनेर सहमती भएको होइन, उहाँहरुबाट पनि आउनु परयो’ चेम्बरका अध्यक्ष श्रेष्ठले भने ‘अब रंगशालामा बाँकी रहेको काम सकेर नगरपालिका संग रकम लिएर हामीलाई दिनुपरयो ।’
तर केहि दिन अघि मेलाको आय ब्यय सार्वजानिक गर्ने क्रममा चेम्बरले एन्फालाई रकम दिइ सकेको भन्दै ६ लाख खर्चमा देखिएको थियो ।