नरेन्द्र ढकाल
गोरखा – राष्ट्रिय गौरबको बुढीगण्डकी आयोजनाको हाल सम्म भए गरेको कामबारे नेपाल पत्रकार महासंघलाई जानकारी गराइएको छ ।
महासघंको केन्द्रिय कार्य समितिको बैठकका लागि गोरखा आएका पदाधिकारी एवं सदस्यहरुलाई आइतबार एक कार्यक्रमका वीच आयोजना कार्यालयका प्रमुख कृष्ण कार्कीले उक्त कुराको जानकारी गराएका हुन् । ‘यस अघि निर्धारण भएको मुआब्जा वितरणको हामी अन्तिम चरणमा पुगि सकेका छौं’ उनले भने ‘अब केही दिनमा बाँकी स्थानको मुल्य निर्धारण गरी वितरण सुरु गछौं ।’ आरुघाट क्षेत्रको मुआब्जा निर्धारणका लगि छलफल भइरहेको उनले बताए ।
हालसम्म आरुघाट र आरखेत बजार क्षेत्र बाहेक अन्यत्रको मुआब्जा निर्धारण गरी १३ हजार ३८५ जग्गा धनीलाई कुल २६ अर्ब ८४ करोड ४६ लाख ४९ हजार ८२६ रुपैयाँ वितरण गरिएको छ ।
गोरखा र धादिङका ४४ हजार ६५८ रोपनी जमिनमा उक्त रकम वितरण गरिएको हो । यसको अलवा विज्ञहरुको टोली मार्फत घर गोठ र बोटविरुवाको लगत संकलन समेत सकिएको कार्कीले बताए ।
यसैगरी पुनर्वास तथा पुनःस्थापना नीति निर्माण, घरगोठ लगायत अन्य संरचनाको ह्रास कट्टी नगर्ने सम्बन्धी नीति र निर्णय, फिल्ड बुक कायम भइको तर लालपुर्जा नभएको मुआब्जा दिने सम्बन्धी निर्णय समेत भएको आयोजना कार्यालयले बताएको छ ।
यसै विच गोरखामा भएको पत्रकार नेपाल महासंघको सातौं पुर्ण बैठक सकिएको छ । सोमबार गोरखाको ऐतिहासिक गोरखा संग्राहालय र मनकामना मन्दिरको दर्शन पछि कार्यक्रम समापन गरिएको हो । चितवनको कुरिनटारमा भएको कार्यक्रममा नेपाल पत्रकार महासंघ गोरखा शाखाले गोरखानाथको प्रसाद रोट, विभुती र गोरखा आयुर्वेद कम्पनीबाट निर्मित गुडुची चिया मायाको चिनोका रुपमा प्रदान गर्दै पत्रकारहरुलाई बिदाई गरेको थियो ।