गोरखा समाचारदाता
गोरखा – नेपाल पत्रकार महासंघले नेपाल–भारत सीमा विवादका विषयमा आवश्यक पहल थाल्न सरकारसँग माग गरेको छ।
कुटनीतिक माध्यमबाट समस्याको समाधान गर्नुपर्नेमा जोड दिदै महासंघले त्यसका लागि तत्काल आवश्यक पहल थाल्न सरकारसँग माग गरेको हो।
गोरखामा बसेको महासंघको आठौं पूर्ण बैठकले सीमा विवाद आपसी समझदारीमा समाधान गरिनुपर्ने राय व्यक्त गरेको छ। विभिन्न समयमा आइरहने सीमा सम्बन्धी विवादले दुई देशबीचको मित्रतापूर्ण सम्बन्धमा असर पर्नेतर्फ ध्यानाकर्षण गराउँदै महासंघले दुवै देशका सम्बन्धित अधिकारी बसेर ऐतिहासिक तथ्य तथ्याङ्क लगायतका आधारमा सीमा विवाद मिलाउनुपर्नेमा जोड दिएको छ।
महासंघका अध्यक्ष गोबिन्द आचार्यको अध्यक्षता बसेको बैठकले उत्तर र दक्षिणतर्फका दुवै छिमेकी मुलुकहरूसँग सौहार्दपूर्ण सम्बन्ध कायम हुनुपर्ने र आपसी सहयोग तथा समझदारी बढाउनुपर्नेमा जोड दिएको छ।
त्यस्तै बैठकले महासंघलको नयाँ सदस्य छनोट तथा हटाउने विषयमा निर्देशिका निर्माण गर्ने निर्णय गरेको छ। सोही निर्देशिकाका आधारमा नयाँ सदस्यता वितरण तथा अद्यावधिक गर्ने बैठकले निर्णय गरेको अध्यक्ष आचार्यले जानकारी दिए।
बैठक महासंघको जिल्ला शाखा गोरखाको व्यवस्थापनमा सम्पन्न भएको हो।
