गोरखा समाचारदाता
गोरखा – भारतले सार्वजानिक गरेको नयाँ नक्सामा नेपाली भूमी मिचिएको भन्दै नेत्रबिक्रम चन्द बिप्लब नेतृत्वको नेकपाले गोरखामा राँके जुलुस प्रर्दशन गरेका छ । भारतको बिस्तारवादी नीति अन्त्य गर्न माग गर्दै नेकपाका कार्यकताले नारावाजी समेत गरेको एक नेताले टेलिफोन मार्फत जानकारी दिए । भारतिय नक्सामा समेटिएका भुभाग फिर्ता गरी नयाँ नक्सा सार्वजानिक गर्न माग गरिएको उनले बताए ।
उक्त विषयलाई लिएर देशभर विरोध सुरु भएको छ । सामाजिक सञ्जालमा सर्वसाधरणले ब्याक टु इन्डिया लेखेर बिरोध जनाइरहेका छन् । उक्त विषयलाई लिएर राजनितिक दल र तिनका भातृ संस्थाहरुले औपचारिक विरोध सुरु गरेका छन् ।
यसै विच नेपाल कम्युनिष्ट पार्टी नेकपा निकट युवा तथा विद्यार्थी संगठनहरुले बिहीबार प्रमुख जिल्ला अधिकारी देबेन्द्र लामिछाने मार्फत नेपाल सरकारलाई ध्यानाकर्षण गराएका छन् ।
साविकको अखिल नेपाल राष्ट्रिय स्वतन्त्र विद्यार्थी युनियन, अखिल नेपाल राष्ट्रिय स्वतन्त्र विद्यार्थी युनियन क्रान्तिकारी, साविकको युवासंगठन वाइसिएल नेपाल र युवासंघले संयुक्त ज्ञापन पत्र बुझाएका हुन् ।
ज्ञापनपत्रमा उनिहरुले भारतीय बिस्तारबादले नेपालको लिम्पियाधुरादेखि लिपुलेकसम्मको भूमि अतिक्रमण गरी नेपालको सार्वभौम अखण्डता माथि ठाडो हस्तक्षेत्र गरेको भन्दै तत्काल कुटनीतिक पहल मार्फत सच्याउन माग गरेका छन् ।
कालापानी र सुस्ताको सिमा–विवाद मिलाउन गठन भएको दुई देशका परराष्ट्रसचिव स्तरीय संयन्त्रको बैठक एकपटक पनि नबसी भारतले एकतर्र्फी रुपमा नेपालको भूमि समेटेर नक्सा सार्वजनिक गर्नु नेपाल माथी ठाडो हस्तक्षेपको प्रयास भएको ज्ञापन पत्रमा उल्लेख गरिएको छ ।
नाकाबन्दीले बिग्रिएको सम्बन्ध पछिल्लो समय सुधारिदै गएका बेला भारतले नेपालको भूमि अतिक्रमण गर्नुले एकपटक नेपाललाई फेरि भस्काएको उल्लेख गरिएको छ ।
सन् १८१६ को सुगौली सन्धिको धारा ५ अनुसार लिम्पियाधुरा कालिनदीको मुहान भएको र काली नदीलाई नेपाल–भारत सिमाना मानिएकाले उक्त भुभाग नेपालको भएकोमा कुनै दुबिधा नरहेको भन्दै तत्काल सच्याउन ज्ञापन पत्र मार्फत माग गरिएको छ ।
त्यसयता ४४ वर्षसम्म लिम्पियाधुरा नै कालिनदीको मुहानको रुपमा निर्विवाद भएको भन्दै ज्ञापन पत्रमा सन् १९६० मा भारत र चीन बिचको युद्धका बेला भारतले काली पार गरेर नेपाली भुमी अतिक्रम गरि लिपुलेकमा भारतले सेना राख्न थालेको उल्लेख छ । ‘अतिक्रमण गरेको भूमि भारतले एकतर्फी रुपमा त्यहाँ बगेको खोलालाई काली नदी मानेर एकतर्फ आफ्नो भूमि भन्दै नक्सा सार्वजनिक गर्नुले भारतीयहरुको बिस्तारबादी शैलीको नाङिगएकोे छ ।’ ज्ञापन पत्रमा भनिएको छ ।
भारतको यस्तो गैह्र जिम्मेवार बिस्तारबादी चरित्र आफुहरुलाई सह्य नुहने भन्दै ज्ञापन पत्रमा तत्काल कमजोरी सच्याएर अघि बढ्न माग गरिएको छ । संयुक्त ज्ञापन पत्रमा साविक अखिल नेपाल राष्ट्रिय स्वतन्त्र बिधार्थी युनियन अध्यक्ष प्रबिण श्रेष्ठ, अखिल नेपाल राष्ट्रिय स्वतन्त्र बिधार्थी युनियन क्रान्तिकारी उपाध्यक्ष बिष्णु पाण्डे, वाइसिएल नेपाल उपाध्यक्ष बालकृष्ण परियार, युवासंघ नेपालका अध्यक्ष सुमन श्रेष्ठले हस्ताक्षर गरेका छन् ।
ज्ञापन पत्र बुझ्नु हुदै प्रमुख जिल्ला अधिकारीले युवा तथा बिधार्थी संगठनको मागलाई सम्बन्धित ठाउँसम्म पु¥याउने प्रतिबद्धता व्यक्त गर्नुभयो । भारतले नेपालको भूमि आफ्नो नक्साबाट नहटाए राष्ट्रिय युवा संघ नेपाल र अनेरास्ववियु कडा सघर्षमा उत्रने चेतावनी समेत दिइएको छ ।