गोरखा समाचारदाता
गोरखा – बारपाक सुलिकोट गाउँपालिकाले जेष्ठ नागरिकहरुलाई घरमा नै स्वास्थ्य जाँचको ब्यवस्था मिलाएको छ ।
आफ्नो पालिका भित्रका बसोबास गर्ने जेष्ठ नागरिकहरुका लागि उनिहरुकै घरमा गएर स्वास्थ्य उपचार सेवा दिने कार्यको थालनी गरेको स्वास्थ्य शाखाका प्रमुख मोदराज भट्टले बताए । भट्टले ‘गाउँपालिकाले चालु आर्थिक बर्षदेखि जेष्ठ नागरिक स्वास्थ्य परिक्षण कार्यक्रम सञ्चालन गरि ८० बर्ष माथिका जेष्ठ नागरिकहरुलाई घरमै पुगेर उपचार सेवादिन शुरु गरेको’ बताए । उनले ‘कार्यक्रमबाट पालिका भित्रका सवै जेष्ठ नागरिकहरुमा स्वास्थ्य सुबिधाको पहुँच पुग्ने’ बताए ।
उपचारको लागि जेष्ठ नागरिकहरु स्वास्थ्य संस्था सम्म आउन असहज हुने भए पछि गाउँपालिकाले घरमा नै पुगेर उपचार गर्ने कार्यक्रम ल्याएको हो । कार्यक्रम अन्रतर्गत पालिका भित्रका सवै स्वास्थ्यकर्मीहरुलाई अभिमुखीकरण कार्यक्रम समेत सम्पन्न गरी सकीएको छ ।
गाउँपालिका भित्रको सबै जेष्ठ नागरिकहरुलाई उपचार गर्ने योजना भएता पनि पहिलो चरणमा ८० बर्ष माथिका जेष्ठ नागरिकहरुलाई मात्र यो सेवा दिने गाउँपालिकाले जानकारी दिएको छ । पर्याप्त स्वास्थ्यकर्मी नभएको भन्दै पालिकाले पहिलो चरणमा ८० बर्ष उमेर माथिका जेष्ठ नागरिकलाई सेवा दिन शुरु गरेको छ । पालिका भित्र १ हजार २ सय भन्दा बढी जेष्ठ नागरिक रहेको अनुमान गरीएको छ ।
उपचारमा संलग्न स्वास्थ्यकर्मीहरुलाई प्रोत्साहन भत्ताको ब्यवस्था गरीएको छ । उनीहरुले महिनाको अन्तिममा सम्पुर्ण विवरण पालिकामा पेश गनुपर्ने ब्यवस्था समेत मिलाइएको कार्यालयले जानकारी दिएको छ । सामान्य पनि १ जना स्वास्थ्यकर्मीले १ दिनमा २० जनाको स्वास्थ्य परीक्षण गर्ने अनुमान गरिएको छ ।
स्वास्थ्यकर्मीहरुले ब्लड प्रेसर, मुटुको चाल, नाडी परीक्षण, दिर्घरोगीको अबस्था, स्वास प्रस्वासको परिक्षण गर्ने ब्यवस्था मिलाईएको छ ।