गोरखा समाचारदाता
गोरखा – गोरखा बजारको हरमटारी चोकमा रोकिराखेको बस आफै गुड्दा दुर्घटना भएको छ ।
बेलुका करिब साडे ५ बजे गोरखा सदरमुकामदेखि आँबुखैरेनी जानका यात्रु चढाउन पार्किङमा राखिएको ना ३ ख ७६८३ नम्बरको बस आफै गुडेर पसलमा ठक्कर दिएको हो । दुर्घटनाका बेला बस भित्र रहेका २ जना यात्रु घाइते भएका छन् ।
घाइते हुनेमा गोरखा नगरपालिका ८ की २० बर्षिय गंगा परियार र वारपाक सुलिकोट ३ की २१ बर्षिय मनिषा परियार रहेको जिल्ला प्रहरी कार्यालय गोरखाले जनाएको छ । उनिहरु दुवैको बाँखा खुट्टामा गहिरो चोट लागेको जिल्ला अस्पतालले गोरखाले जनाएको छ ।
यात्रु खोज्न चालक बसबाट निस्केर चोकसम्म पुग्दा बस आफै गुडेको प्रत्यक्षदर्शीले बताएका छन् । हरमटारी चोकबाट झण्डै २ मिटर गुडेर बस रंगशाला चोक नजिकैको एक अस्थायी टहरोमा रहेको पसलमा ठक्कर दिएको थियो ।
ठक्करबाट पसल र बसमा समेत क्षती पुगेको बताइएको छ । बसका चालकलाई प्रहरीले नियन्नत्रणमा लिई अनुसन्धान सुरु गरेको जनाएको छ ।