गोरखा समाचारदाता
गोरखा – गोरखा प्रहरीले महिना भरी राम्रो काम गर्ने प्रहरीलाई ‘पुलिस अफ द मन्थ’ पुरस्कारको ब्यवस्था गरेको छ ।
पहिले भन्दा प्रहरीलाई काममा लगनशिल र उर्जाबान बनाउन उत्त कार्यक्रम ल्याईएको जिल्ला प्रहरी कार्यालय गोरखाका प्रहरी उपरिक्षक ओमप्रसाद शर्माले बताए । उनले समाजमा घटेको जघन्य अपराधको अनुसन्धानमा सहयोग गर्ने प्रहरी मध्ये राम्रो प्रहरीलाई ‘पुलिस अफ द मन्थ’ घोषणा गरीएको बताए ।
जिल्ला प्रहरी कायाृलय गोरखाको प्राङगणमा एक कार्यक्रम गरी प्रहरी प्रमुख शर्माले प्रहरी निरिक्षक रामचन्द्र घिमिरेलाई भाद्र महिनाको ‘पुलिस अफ द मन्थ’ घोषणा गरेका थिए । घिमिरले गएको साउन २७ गते गोरखा सदरमुकाममा श्याम घिमिरे हत्या काण्डको अनुसन्धानमा सफल अनुसन्धान गरेको भन्दै ‘पुलिस अफ द मन्थ’ घोषणा गरेको हो ।
पुरस्कृत भएको प्रहरीलाई रेकर्डमा जनिने गरी नगद पुरस्कार समेत प्रदान गरीएको थियो । पुरस्कार पाउने प्रहरीको ठुलो साईजमा साईबोर्ड बनाएर प्रहरी कार्यालय जाने मुख्य द्वारमा राख्ने ब्यवस्था मिलाईएको जिल्ला प्रहरी कार्यालय गोरखाले जानकारी दिएको छ ।
‘पुलिस अफ द मन्थ’ ले पुरस्कृत गर्नुपुर्व जिल्ला भित्रका सबै प्रहरीको रेकर्ड भिडाएर १ जनालाई चयन गर्ने गरीएको कार्यालयले जनाएको छ । यो आर्थिक बर्षको पहिलो ‘पुलिस अफ द मन्थ’ भने प्रहरी निरिक्षक भिमबहादुर खत्रीलाई प्रदान गरीएको थियो ।
जिल्ला प्रहरी कार्यालय गोरखाले गरेको उत्त कार्यक्रममा ०७२ साल देखी सर्व साधारणहरुको चोरी भएको मोबाई खोजी गरी बुझाएको थियो ।
दोस्रो पटक मोबाईल धनीलाई ५ वटा मोबाईल बुझाईएको कार्यक्रममा जानकारी गराइएको थियो ।
चोरी तथा हराएका मोबाईल राजधानी र विभिन्न शहरमा विभिन्न ब्यक्तिले चलाउदै गरेको अवस्थामा ब्यक्तीलाई नियन्त्रणमा लिएर मोबाईल धनीलाई फिर्ता गरीएको हो ।
हराएको मोवाइल खोज्नकै कार्यालयले प्रहरीहरुको एक छुट्टै मोवाइल खोज तलास टिम गठन समेत गरेको छ ।