गोरखा समाचारदाता
गोरखा – हत्या काण्ड र फिरौती असुलीमा संलग्न देखिए पछि गृहमन्त्रि रामबहादुर थापाका साईला भाई नरेश थापालाई प्रहरीले पक्राउ गरेको छ ।
राजधानीमा दुई वर्षअघि भएको हत्याकाण्डका मुख्य अभियुक्तसँग मिलेर फिरौती संकलनमा सक्रिय रहेको भन्दै प्रहरीले थापा पक्राउ परेका हो।
नेपाल निर्माण व्यवसायी महासंघका अध्यक्ष शरदकुमार गौचनको ०७२ असोज २३ गते घरबाट कार्यालय जाँदै गर्दा शान्तिनगरमा गाडीभित्रै गोली प्रहार गरी हत्या गरेका मुख्य योजनाकार समीरमान बस्नेतसँग नरेशको सम्पर्क जोडिएको देखिको प्रहरीले उनलाई पक्राउ गरेको प्रहरीको दाबी छ।
पछिल्लो समय सुन्धारास्थित केन्द्रीय कारागारमा रहेका समीरले थुनाभित्रैबाट फिरौती संकलन तिब्र बनाएको सूचना पाएपछि सीआइबीले गत साउन अन्तिमसाता उनका सहयोगीहरु पवन खड्का र सुरेन नगरकोटीलाई समातेको थियो । समीरले फिरौती संकलनमा खटाएका २ जना पक्राउ परेसँगै नरेश अनुसन्धानमा तानिएको हो ।
घटना सार्वजनिक हुँदा अप्ठ्यारो पर्ने भन्दै प्रहरीले यस मामिलालाई अति गोप्य राख्न चाहेको छ। स्रोतका अनुसार गृहमन्त्रीका भाइ नरेश र पवनबीच मिलेर काम गर्नुपर्छ भन्ने आशयका सन्देश आदानप्रदान भएको मोबाईल सन्देश देखिन्छ।