नरेन्द्र ढकाल
गोरखा – पदेली र ठूलो आँगन क्षेत्रका स्थानीयले मालबाहक (हेबी) गाडी सञ्चालनमा रोक लगाउन माग गरेका छन् ।
ठूला गाडीका कारण सडक बिग्रिनुका साथै साघुँरो बाटोमा दुर्घटनाको जोखिम समेत बढेको उनीहरुको गुनासो छ । ‘ठूला गाडीले यहाँको ढुङ्गा उप्कायो, बाटो बिग्रियो’ पदेली टोल बिकास संस्थाका सचिव अयोध्या जोशीले भने ‘त्यसैले पहिले जस्तै गरी रोक लगाउनु पर्छ भन्ने हाम्रो माग हो ।’ सो क्षेत्रमा भूकम्प अघिसम्म ठूला मालबाहक सवारी साधन सञ्चालनमा रोक लगाइएको थियो ।
अहिले सबै किसिमका सवारी साधन निर्वाध छोडिदिदाँ समस्या भएको स्थानीयको गुनासो छ । ‘त्यस्ता गाडीलाई रोकी पाउँ भनेर हामीले सिडिओ सापलाई एउटा पत्र पनि दिएका छौं’ उनले भने ‘तर अहिलेसम्म केही प्रतिक्रिया आएको छैन् ।’ यता प्रमुख जिल्ला अधिकारी देबेन्द्र लामिछानेले भने आवश्यक समन्वय भइहरेको प्रतिक्रिया दिएको छन् ।
‘यो नगरक्षेत्र भित्रको सडक भयो हामीले मात्र निर्णय गरेर भएन’ उनले भने ‘टोल बिकास समितिले पत्र बुझाउने बित्तिकै हामीले नगरपालिकासँग पत्र मार्फत राय मागेका छौं । उहाँहरुको राय प्राप्त भएपछि आवश्यक निर्णय हुन्छ ।’ नगरपालिकाले स्वीकृती दिने बित्तिकै व्यवस्थापनका लागि ट्राफिक खटाइने जिल्ला प्रशासनको तयारी छ ।
गोरखा नगरपालिका पनि स्थानीयको मागसँग सहमत छ । ‘त्यो बाटोमा हेबी गाडी रोक्नु पर्छ भन्ने हाम्रो पनि धारणा हो’ नगरप्रमुख राजनराज पन्तले भने ‘हामी सर्वपक्षिय बैठकको तयारी गरिरहेका छौं, यस विषयमा छिट्टै निर्णय हुन्छ ।’ ठूला मालबाहक सवारी साधनलाई नयाँपार्क हुँदै चिल्डूेनपार्कको बाटोबाट पठाउने तयारी गरेपनि चिल्डेूनपार्कमा सडक मर्मत गर्नुपर्ने समस्या रहेको नगरपालिका श्रोतले बताएको छ ।
उक्त सडक तत्काल मर्मत गरेर हेबी सवारी साधन चिल्डूेनपार्कको बाटो पठाउने नगरपालिकाको तयारी छ । ढुङ्गा छापिएको साँघुरो सडकमा ठूलो मालबाहक सवारी साधन सञ्चालन गर्दा पदेली र ठूलो आगँन आसपासका घर थर्किने, हल्लिने समस्या रहेको स्थानीयको भनाई छ । ठूला सवारीका कारण घण्टौं जाम समेत हुने गरेको छ ।