नरेन्द्र ढकाल
गोरखा – जिल्लामा सञ्चालन हुन लागेको धान जोन कार्यक्रमका लागि ७ हजार हेक्टर जमिन प्रस्ताव गरिएको छ ।
बिहिबार भएको कार्यशाला गोष्ठीमा धान जोन क्षेत्र निर्धारण समितिले दरौंदी करिडोरको ७ हजार हेक्टर जमिनमा धान जोन कार्यक्रम सञ्चालन गर्न उपयुक्त हुने बताएको हो ।
‘हामीले रबिन्द्र पौडेलको संयोजक, लेखराज ढकाल र भवनाथ देबकोटा सदस्य रहेको क्षेत्र निर्धारण समिति बनाएका थियौं’ प्रधानमन्त्री कृषि आधुनिकरण परियोजना गोरखाका प्रमुख अजय अधिकारीले भने ‘उहाँहरुले आफ्नो प्रतिवेदन बुझाइसक्नु भएको छ ।’ उक्त समितिले अजिरकोट गाउँपालिका ५ मुच्चोक देखि गोरखा नगरपालिका १४ देउरालीसम्म दरौदी नदिको दुबै किनारमा रहेका धान उत्पादन राम्रो हुने ७ हजार हेक्टर जमिनमा जोन कार्यक्रम गर्न उपयुक्त हुने ठहर गरेको हो । ‘उहाँहरुले स्थानीय कृषक, जनप्रनिधि र सरोकारवाहरुसँग आवश्यक छलफल गर्नुभएको छ’ उनले भने ‘विभिन्न ठाउँमा अन्र्तक्रिया गरेर विज्ञको सुझाव समेत समेटेर प्रतिवेदन बनाइएको छ ।’
प्रतिवेदनमा गोरखा नगरपालिका वडा नम्बर ३, ५, १०, ११, १२, १३ र १४ पालुङ्टार नगरपालिकाको १, र ९, सिरानचोक गाउँपालिकाको ४, ५,६, ७, ८ र अजिरकोट गाउँपालिका ५ लाई धान जोनमा समावेश गर्नुपर्ने उल्लेख गरिएको छ ।
उक्त कार्यक्रमबाट ६५ वटा समूह, सहकारी र ११ सय किसानहरु प्रत्यक्ष लाभाम्वित हुने बताइएको छ । सोही प्रतिवदेनका बारेमा बिहीबार जिल्लाका सरोकारवालाहरुले छलफल गरेका छन् । परियोजनाका जिल्ला प्रमुख अजय अधिकारीको अध्यक्षता, जिल्ला समन्वय समितिका प्रमुख अशोककुमार गुरुङको अध्यक्षता तथा गोरखा नगरपालिकाका प्रमुख राजनराज पन्तको विशेष आतिथ्यतामा भएको कार्यक्रममा जोन क्षेत्र निर्धारणका बारेमा सरोबारवालाहरु विच छलफल भएको हो ।
गोष्ठीमा आफ्नो धारणा राख्दै जिल्लाका सरोकारवालाहरुले जोन कार्यक्रमले धानको उत्पादन बढ्नुका साथै कृषकको जिवनस्तर उकासिनु पर्ने कुरामा जोड दिएका थिए । दरौंदी करिडोर धान उपत्पादका लागि उर्बर भूमी भएको भन्दै जोन कार्यक्रम सञ्चालन पश्चात किसानलाई थप व्यवसायिक बनाउने उनीहरुको अपेक्षा छ ।
सरकारले प्रधानमन्त्री कृषि आधुनिकिकरण परियोजना मार्फत जिल्लामा धान जोन सञ्चालन गर्नका लागि १ करोड ३० लाख बजेट पठाएको छ । उक्त रकमबाट धान खेति सम्बन्धि तालिम, गोष्ठी, कृषकको भ्रमण, उन्नत प्रविद्धि प्रदर्शन, साना सिंचाई, भकारो सुधार, बैकिल्प उर्जा उपलब्ध, मल, बिऊ, औजार, कृषि चुन वितरण लगायतका कार्यक्रम सञ्चालन गर्ने योजना छ ।
कार्यक्रममा जिसस प्रमुख गुरुङ, गोरखा नगरपालिकाका प्रमुख पन्त, कृषकहरु पुष्पा कुमाल, कृषि विज्ञ दुर्गाप्रसाद पण्डित लगायतले मन्तव्य राखेका थिए ।