मोहसिन अलि मिया
गाेरखा – ट्राफिक प्रहरीले चेक जाँचलाई कडाईका साथ अघि बढाएसंगै जिल्लामा कारबाहीमा पर्ने सवारीको संख्यामा बृद्धि भएको छ ।
जिल्ला ट्राफिक कार्यालय गोरखाले साउन महिनामा जिल्लाका बिभिन्न स्थानमा गरेको चेकजाँचका क्रममा नियम उल्लंघन गरेको भन्दै सवारी साधनबाट ७ लाख ५७ हजार ५ सय रुपैया जरिवाना असुलेको छ ।
ट्राफिक नियम विपरित संचालनमा रहेका बिभिन्न प्रकारका १ हजार ५० सवारी साधनबाट सो रकम बराबरको जरिवाना संकलन भएको ट्राफिक प्रमुख सुक बहादुर विकले बताए ।
ट्राफिक प्रहरीसंग रहेको तथ्यांकमा सबैभन्दा बढी नियम मिच्नेमा मोटरसाइकल चालक छन् ।
साउन महिनामा मात्रै ३ सय १९ मोटरसाइकल चालकले नियम उल्लंघन गर्दा २ लाख ३८ हजार जरिवाना वापत राजश्व उठेको छ ।
त्यस्तै नियम नमान्नेमा कार, जिप, ट्याक्सी, भ्यान लगायतका साना सवारी साधनका चालक पनि कम छैनन् । उनिहरुले गत महिनामा मात्रै २ लाख २३ हजार रुपैया ट्राफिकलाई जरिवाना बुझाएका थिए । जसमा ३ सय ९ वटा सवारी साधन कारबाहीमा परेका छन् ।
त्यस्तै १ सय७९ ट्रिप्पर तथा ट्रकका चालकले नियम उल्लंघन गरेको ट्राफिकको भनाई छ ।
बढी लोड तथा प्रयोजन विपरित संचालन भएका यस्ता सवारीबाट १ लाख २२ हजार रुपैया राजश्वमा संकलन भएको छ भने बस तथा माइक्रोबाट १ लाख ५ सय जरिवाना उठाइएको छ ।
साउनमा १ सय ४२ बस नियम विपरित संचालनमा रहेकाले उनिहरुलाई कारबाहीको दायरामा ल्याइएको ट्राफिक प्रमुख विकले बताए । यता १ सय ११ वटा ट्याक्टर समेत प्रहरी फन्दामा परेका छन् ।
ट्राफिक नियम विपरित संचालनमा रहेका सो संख्याका ट्याक्टरबाट ७४ हजार जरिवाना प्रहरीले असुलेको हो ।
जिल्ला सदरमुकाम आसपास क्षेत्रमा मात्रै केन्द्रित रहने ट्राफिक चेकजाँच गाउँपालिका स्तरमा समेत सुरु भएपछि कारवाहीमा पर्ने सवारीको संख्या बढेको कार्यालयको भनाई छ । ‘अहिले हामीले गाउँगाउँमा पनि चेकजाँचलाई कडाइका साथ अघि बढाएका छौ’ ट्राफिक प्रमुख विकले भने ‘चेक जाँच बढेकै कारण जरिवाना पनि बढेको हो ।’
प्रयोजन विपरित संचालनमा रहेका सवारी साधन, मादक पदार्थ सेवन गरी सवारी चलाउने चालक, सवारी अनुमती पत्र नभएका, अवस्था ठिक नभएका, सिट क्षमता भन्दा बढी यात्रु बोक्ने सवारी, ओजन, भार भन्दा बढी सामान बोक्ने लगायत बिभिन्न खाले नियम मिच्दै सवारी हाक्नेहरुलाई कारबाहीको दायरामा ल्याउन प्रहरीले अभियान नै चलाएको जिल्ला ट्राफिक कार्यालय गोरखाका सुचना अधिकारी टिका शर्माले बताए ।
पछिल्लो समय आरुघाट, घ्याम्पेशाल, नयाँपुल, पालुङ्टार, चोरकाटे, कोखेआहाले, बुंकोट, बाह्र किलो लगायतका क्षेत्रमा ट्राफिक प्रहरीले चेकजाँच बढाएको छ ।
त्यस्तै आर्थिक बर्ष २०७५/०७६ मा १० हजार ६ सय सवारी साधनलाई कारबाही गर्दा ट्राफिकले ७२ लाख ३० हजार जरिवाना काटेको थियो ।
त्यस्तै २०७४/०७५ मा ७१ लाख ६० हजार राजश्व संकलन हुदा ११ हजार सवारी कारबाहीमा परेका थिए । यसैगरी ८ हजार सवारीबाट आर्थिक बर्ष २०७२/०७३ मा ५१ लाख ५३ हजार ५ सय जरिवाना असुल भएको कार्यालयको तथ्यांकमा छ ।
यो तथ्यांकलाई हेर्दा बर्षेनी जरिवाना वापतको रकममा बृद्धि हुदै गएको देखिन्छ । नियम उल्लंघन गर्ने सवारी वा चालकलाई दिर्घकालिन समाधानको उपाय खोज्नु भन्दा जरिवाना काट्न नै ट्राफिक प्रहरी केन्द्रित बनेको सरोकारवालाहरु बताउछन् ।
फाइल तस्विर