गोरखा समाचारदाता
गोरखा – नजिकिदै गरेको वडा दशैंलाई लक्षित गर्दै गोरखा सदरमुकाममा दोस्रो दशैं सस्तो मेला हुने भएको छ ।
गोरखा च्याम्बर अफ कमर्सको आयोजनामा सदरमुकामको खेलकुद मैदानमा दोस्रो दशैं सस्तो मेला हुन लागेको हो ।
च्याम्बर अफ कमर्सले सदरमुकाममा पत्रकार सम्मेलनको आयोजना गर्दै आउदो असोज ८ गते देखी १७ गते सम्म सदरमुकामको खेलकुद मैदानमा दोस्रो दशैं सस्तो मेला आयोजनाको तयारी गरेको अध्यक्ष भाईचन्द्र श्रेष्ठले जानकारी दिए ।
श्रेष्ठका अनुसार मेला आयोजना गर्नका लागि आवश्यक कानूनी प्रकृयामा लागेको भन्दै मेलाबाट सर्व साधारण जनताहरुले लाभ लिन सक्ने बताए ।
स्थानिय उत्पादनलाई विशेष प्रार्थमिकतामा राखेर मेलाको आयोजना गरीएको आयोजक च्याम्बर अफ कमर्स गोरखाले जानकारी दिएको छ । यो बर्ष पनि जिल्ला भित्र उत्पादन भएका घरेलु सामाग्री, स्थानिय उत्पादन तथा बहुमुल्य जडिबुटीलाई निशुल्क स्टल उपलब्ध गराउने भएको छ ।
१ सय ४० वटा स्टल रहने मेलामा ८ करोड बरावरको कारोवार हुने अनुमान गरिएको छ । स्थानिय देखी राष्ट्रिय स्तरका कलाकारहरुको प्रस्तुती समेत रहेको मेलामा मुस्ताङ देखी ल्याईने च्याग्रा समेत बिक्री हुने बताइएको छ ।
जिल्ला भित्रै रहेको कटकनाथ कुखुरा देखी खशी बोका समेत स्टलमा बिक्रीको लागि राखिने भएको छ । च्याम्बर अफ कमर्समा आवद्वहरुका लागि ५० वटा स्टल छुटाएको र बाँकी सबै जिल्ला भन्दा बाहिरबाट आउने आगन्तुक ब्यापारीहरुका लागि छुटाएको समेत पत्रकार सम्मेलनमा अध्यक्ष श्रेष्ठले बताए ।
महोत्सव अवधी भरमा ४२ लाख खर्च हुने अनुमान कमर्सले गरेको छ ।