गोरखा समाचारदाता
गोरखामा नेकपा (क्रान्तिकारी माओवादी) का दिवंगत नेता श्रीनाथ अधिकारी प्रति श्रद्धाञ्जली कार्यक्रम सम्पन्न भएको छ । असार २२ गते उपचारका क्रममा काठमाण्डौमा निधन भएका नेता अधिकारीको सम्झनामा गोरखा सदरमुकाममा श्रद्धाञ्जली कार्यक्रम भएको हो । सुरेश वाग्ले (बासु) स्मृति प्रतिष्ठानद्वारा आयोजित कार्यक्रममा बोल्दै नेकपा प्रबक्ता नारायणकाजी श्रेष्ठले अधिकारीका सकारात्मक चरित्रको सबैले शिक्षा लिन जरुरी रहेको बताएका छन् । अधिकारीको क्रान्तिप्रतिको निष्ठा, निरन्तरता, सरलता, स्वच्छता, जनतासंग घुलमिल हुन सक्ने क्षमता सबैले अनुसरण गर्नु पर्ने उनले बताए ।
प्रबक्ता श्रेष्ठले उनलाई सच्चा श्रद्धाञ्जली दिने हो भने हामी समाजवाद पुग्ने बाटो तयार गर्न सक्नु पर्ने धारणा ब्यक्त गरे । फरक प्रसंगमा बोल्दै श्रेष्ठले सरकारमा गएर जनता लाई जोड्दै आर्थिक सामाजिक रुपान्तरण समाजवाद समृद्धिको लक्ष्य नै नेकपा लक्ष्य भएको बताए । पद, शक्ति र सम्पत्तिका लागि पार्टीमा जे पनि गरिदिने प्रवृत्ति बढेको प्रति असन्तुष्टी समेत पोखेका छन् । ‘पोस्ट, पावर र पपर्टीका लागि जे पनि गरिदिने ?’ श्रेष्ठले प्रश्न गरे, ‘हामी ठूलो कांग्रेस हुन खोजेर भइँदैन । कम्युनिष्ट क्रान्तिकारी बुझेर जनताले हामीलाई शक्तिशाली बनाएको हो ।’
पब्लिक, प्राइभेट साझेदारी गर्न पीपीपी आवश्यक भए पनि पार्टीभित्र अर्कै रुपमा बुझ्न थालिनु गलत भएको बताए । ‘हामी सम्पूर्ण रुपले पब्लिक प्राइभेट पार्टनरसीपमा लाग्नुपर्ने हो तर नीति र आचरणले हामीलाई दाई कांग्रेस हुन खोजेको देखियो ।’ पार्टीले वैचारिक र साँस्कृतिक समस्या हल गरी प्रष्ट भएर अघि बढ्नु पर्ने श्रेष्ठले बताए ।
शहिद सुरेश वाग्ले वासु स्मृति प्रतिष्ठानका अध्यक्ष लोकनाथ वाग्लेको अध्यक्षतामा भएको कार्यक्रमका नेपाल कम्युनिष्ट पार्टी नेकपाका गण्डकी प्रदेश अध्यक्ष हितराज पाण्डे, नेकपा केन्द्रिय सदस्य लेखनाथ न्यौपाने, नेकपाका जिल्ला सचीव प्रेम गुरुङ, नेकपा क्रान्तिकारी माओवादीका केन्द्रिय सदस्य नारायण अधिकारी, कम्युनिष्ट नेता भक्ति लामिछाने, स्वर्गीय श्रीनाथ अधिकारीकी बहिनी शान्ता अधिकारी, शिक्षक टीकाराम श्रेष्ठ लगायतले मन्तब्य ब्यक्त गरेका थिए ।
मोहन वैद्य नेतृत्वको नेकपा क्रान्तीकारी माओवादीका पोलिटव्युरो सदस्य समेत रहेका श्रीनाथ अधिकारीको फोक्सो क्यान्सरका कारण ६४ वर्षको उमेरमा उपचारको क्रममा निधन भएको थियो ।