गोरखा समाचारदाता
नेपालका समीर श्रेष्ठले १२ औं दक्षिण एसियाली शारीरिक सुगठन च्याम्पियन सिपको पुरुष ६५ केजी तौल समूहमा स्वर्ण जितेका छन् ।
राजधानीको कमलादी स्थित प्रज्ञा भवनमा भएको च्याम्पियनसिपको पहिलो दिन ६५ केजी तौलमा श्रेष्ठले भारतका दिनेश काम्बली र नेपालका प्रज्वलमान शाक्यलाई पछाडि पारेका थिए । भारतका दिनेशले रजत पदक हात पारे भने नेपालका प्रज्वलले कांस्य पदक जिते । समूह विजेता रहेकाले समीरले ओभरअलमा पनि प्रतिस्पर्धा गर्नेछन् ।
शुक्रबार पहिलो दिन ६ स्पर्धामा नेपाली खेलाडीले १ स्वर्ण, ४ रजत र ३ कांस्य पदक जितेका छन् । पुरुष ५५ केजीमा नेपालका किसनदास महर्जनले कांस्य जिते । माल्दिभ्सका मोहम्मद मुसाले स्वर्ण र भारतका मुर्गन रामा मूर्तिले रजत जितेका थिए । ६० केजीमा नेपालका कमल भण्डारी रजत जित्न सफल भए । भारतका दीपु दत्तले स्वर्ण र अफगानिस्तानका मोहम्मद कसिम हुसैनले कांस्य जिते ।
नेपाल शारीरिक सुगठन तथा फिटनेस संघद्वारा आयोजित प्रतियोगिताको पुरुष ७० केजीमा नेपालका रमेश कार्कीले रजत जिते । यस तौलमा अफगानिस्तानका खेलाडीहरु अब्दुल सामी हैदारीले स्वर्ण र इमरान अलीले कांस्य जिते । महिला एथलेटिक फिजिकमा नेपालले २ पदक जित्यो । रजनी श्रेष्ठले रजत र सुजिता मानन्धरले कांस्य जितेकी हुन् ।
भारतकी निशा भोयरले स्वर्ण जितिन् । पुरुष फिटनेस फिजिकमा नेपालका राजु राईले रजत जिते । अफगानिस्तानका हमिदुल्लाह खुशदिलले स्वर्ण र सलिम साह अनवारीले कांस्य जितेका थिए । प्रतियोगिताका अन्य १२ इभेन्टका खेल शनिबार हुनेछ ।
