- एकिकरण पार्क देखि रिङ्रोड सम्मका योजना
नरेन्दै ढकाल
असार ३० गते । सिरानचोक गाउँपालिकाले आगामी आर्थिक वर्षका लागि नीति तथा कार्यक्रम र बजेट सार्वजानिक गरेको छ । जिल्लाका अधिकाशं स्थानीय तहले नीति तथा कार्यक्रम र बजेट सार्वजानिक गरिसक्दा समेत तयारीमा जुटिरहेको सिरानचोकले केही गौरवका योजनाहरु सहित ६४ करोडको बजेट सार्वजानिक गरेको हो । ‘केही नयाँ कार्यक्रमलाई अघि सारेका छौं’ गाउँपालिका अध्यक्ष राजु गुरुङले भने ‘केही पुराना राम्रा कार्यक्रमले पनि निरन्तरता पाएका छन् ।
आईतबार गाउँसभामा उपाध्यक्ष रीता देवकोटाले नीति तथा कार्यक्रम र बजेट पेश गरेकी हुन् । सिरानचोक कोटको संरक्षण, कोट परिसरमा नेपालका राष्ट्रिय विभूती अमरसिहं थापा र विरसेना झाजल गुरुङको स्मारक पार्क बनाउने, वडा नम्बर ५ ग्रागे भञ्जाङमा नेपाल एकिकरण पार्क निर्माण गर्ने, सिरानचोक चक्रपथलाई पुर्णता दिने, गाउँपालिका अध्यक्ष शैक्षिक सुधार कार्यक्रमलाई निरन्तरता दिने लगायतका कार्यक्रमहरुलाई गौरबको योजनाको रुपमा व्यख्या गरिएको छ । ‘रिङरोडको काम हामीले गत वर्ष देखि नै सुरु गरेका थियौं, यस वर्ष पूर्णता दिने काम हुन्छ’ अध्यक्ष गुरुङले भने ‘पार्क बनाउने, कोट संरक्षण गर्ने कामले पनि आगामी ४ वर्ष भित्र पूर्णता पाउँछ ।’ ‘हाम्रो इतिहास, हाम्रो गौरव, हाम्रो पर्यटन’ भन्ने मुल नाराका साथ विकास र पर्यटनलाई सँगसँगै अघि बढाउने नीति लिइएको छ ।
बित्तिय समानीकरण तर्फ संघीय सरकार मार्फत रु. १३ करोड ४७ लाख र प्रदेश सरकार मार्फत रु. १ करोड २१ लाख ८९ हजार, विद्युत रोयल्टी तर्फ रु. १ लाख ९६ हजार ८ सय २८, जिल्ला समन्वय समितिको अनुदान रु.१ करोड १० लाख, अघिल्लो आर्थिक वर्षको अनुमानित रु. ७ करोड ५२ लाख २९ हजार, सामाजिक सुरक्षा भत्ता तर्फ रु. ११ करोड, संघीय सरकार र प्रदेश सरकारको राजश्व रु.७ करोड ७२ लाख २१ हजार तथा संघीय सरकारको शसर्त अनुदान रु. २० करोड ९७ लाख गरी जम्मा रु. ६४ करोड २ लाख ३५ हजार ८ सय २८ अनुमानित बजेट पेश गरिएको हो ।
बजेटमा विभिन्न प्राथमिकताहरु समेत निर्धारण गरिएको छ । समुन्नत समाजको निर्माण र समृद्धिको लागि सिरानचोकको विकास, भुकम्पबाट क्षतिग्रस्त निजि आवास पुनःनिर्माणमा जोड, कृषिको विविधिकरण र व्यबसायिकरण, सडक स्तोरउन्ती तथा आवश्यक सडक निर्माणको नयाँ ट्रयाकको अन्त्य गर्ने र पर्यटन पुर्वाधारको विकासलाई मुख्य जोड दिइएको छ । यसैगरी गुणस्तरिय शिक्षा, खेलकुद, प्राविधिक शिक्षामा जोड, खानेपानी तथा सरसफाईमा पहुँच बृद्धि, स्वरोजगारको सृजना गरी आयआर्जनमा वृद्धि र सार्वजनिक सेवा प्रवाहमा प्रभावकारितालाई बजेटले जोड दिएको छ ।
यसैगरी बेरोजगारी अन्त्य गर्नका लागि कृषि र पशुपालनमा अनुदान प्रदान गर्ने, महिला तथा बालबालिकाको स्वास्थ्य प्रर्वद्धनका लागि आमा समूह बैठकलाई जोड दिने, सार्वजानिक पूर्वाधार निर्माणमा श्रमदान गर्ने बानीको बिकास गर्ने ‘मेरो श्रम हाम्रो बिकास’ कार्यक्रमलाई गाउँपालिकाले विशेष महत्व दिएको छ । सिरानचोकले आगामी आर्थिक वर्षमा एक करोड राजस्व उठाउने अनुमान गरेको छ । अहिलेसम्म गाउँपालिकाको केन्द्र निर्धारण गर्न नसकेको उक्त गाउँपालिकाले सोको टुंगो लगाएपछि बजेट ल्याउने तयारी गरेको थियो ।
तर सहमती नजुटेपछि उक्त विषयलाई स्थगित गरी आगामी वर्षको नीति तथा कार्यक्रम बजेट ल्याएको हो । ‘केन्द्र निर्धारण नहुँदा हामीले अन्य पूर्वाधारका काम सुरु गर्न पाएका छैनौं, एउटै भवनबाट सेवा प्रवाह गर्न धेरै समस्या भएको छ’ अध्यक्ष गुरुङले भने ‘केन्द्र फाइनल गरेर बजेट ल्याउन त भन्दा ढिला हुन गएको हो ।’ अध्यक्ष गुरुङको अध्यक्षतामा भएको सभाले केही ऐनहरु समेत पास गरेको छ । अन्य ऐन तथा नियामवलीहरु छलफल कै क्रममा रहेकाले हिउँदे अधिवेशन केही दिनका लागि स्थगित गरिएको सिरानचोक गाउँपालिकाले जनाएको छ ।
