गोरखा समाचारदाता
असार ३० गते ।गोरखा सदरमुकामको मुख्य चोक हरमटारीमा सडक जिर्ण भएको धेरै भयो । सडक डिभिजन कार्यालय दमौलीको क्षेत्राधिकार भित्र भनिएको उक्त सडक मर्मतमा सो कार्यलयले चासो देखाएन । ‘मुख्य चोकैमा सडकको अबस्था दयनिय बन्यो, मर्मतका लागि हामीले पटक–पटक आग्रह गरेयौं तर सडक डिभिजनले सुन्ने कान लगाएन’ गोरखा नगरपालिकाका प्रमुख राजनराज पन्तले भने ‘केही उपाय नलागेपछि अयन्त्रको रकम कटौती गरेर भएपनि अहिले नगरपालिकाले नै ढलान गरिरहेका छ ।’
अमरसिंह राजमार्ग अन्र्तगत पर्ने गोरखा आँबुखैरेनी सडकको हरमटारीचोकमा पिच भत्किएर ठूलो खाल्डो परेपछि सडक मर्मत शीर्षकमा रहेका १० लाख रकम ढलान गरिएको हो । उक्त रकम नगर क्षेत्रका अन्य शाखा सडक मर्मतका लागि छुट्याएको भएपनि मुख्य चोक मै सडक भत्किएर दुर्घटनाको जोखिम बढाएपछि नगरपालिकाले सो सडक ढलान गर्ने निष्र्कषमा पुगेको प्रमुख पन्तले बताए । सडकको अबस्था दयनिय हुँदा पनि नगरपालिकाले मर्मत नगरेको भन्दै सर्वत्र आलोचना भएको थियो ।
अहिले एका तर्फको सडक ढलान भइसकेको छ । ‘राजमार्ग बन्द गरेर काम गर्न मिलेन त्यसैले एक पट्टि मात्र ढलान गरिएको हो’ गोरखा नगरपालिकाका प्राविधिक निशान पाठकले भने ‘त्यसको सेटिङ टाइम २८ दिनको हुन्छ । अब एक हप्ता पछि पहिलो खण्ड खुल्ला गरि दोश्रोमा ढलान गर्ने हाम्रो योजना छ । पहिलो खण्डमा २० मिटर लम्बाइ र ३.७५ मिटर चौडाइ ढलान गरिएको छ । दोश्रो खण्डमा १७ मिटर लम्बाई र ३.७५ मिटर चौडाइ ढलान हुने उनले बताए । ‘त्यहाँ पानी व्यवस्थापन राम्रोसँग नहुँदा बारम्बार सडक भत्कियो’ पाठकले भने ‘अब ढलान गरेपछि पहिले जस्तो खाल्डाखुल्डी हुँदैन ।’ ढलान गरिएको सडकमा प्राविधिक हिसाबले दुर्घटनाको कुनै जोखिम नरहने उनले स्पष्ट पारेका छन् ।
सडक डिभिजन कार्यालयले नगरक्षेत्रको सडक मर्मतमा वेवास्ता गरेको गोरखा नगरपालिकाले आरोप लगाएको छ । गत वर्ष स्तरउन्नती गरिएको गोरखा आँबुखैरेनी सडक एक वर्षसम्म भत्किए सोही ठेकेदारलाई मर्मत गर्न लगाउनु पर्ने भएपनि अटेर गरेको नगर प्रमुख पन्तले बताए । ‘गत वर्ष गरेको पिच पनि भत्किइसकेको छ । कतै नाली भत्किएको छ’ उनले भने ‘नियमत एक वर्ष भित्र भत्किए सोही ठेकेदारले मर्मत गर्नुपर्छ तर हामीले आग्रह गर्दा पनि कार्यालय ठेकेदारलाई काममा लगाएको छैन् ।’
पछिल्लो समय क्षेत्राधिकारका विषयलाई लिएर विभिन्न ठाउँमा यस्ता समस्या निम्तिएका छन् । राजमार्गहरु संघ सरकार, जिल्ला सदरमुकाम जोड्ने सडक प्रदेश र शाखा सडक स्थानीय तहले हेर्ने भनिए पनि आपसी समन्वय नहुँदा जनता भने सास्ती भोग्न बाध्य छन् ।
फाईल तस्बिर