गोरखा समाचारदाता
असार २८ गते । गोरखा जिल्लाको जोखिम वस्तीका ३ सय ४७ जना भूकम्पपीडितले जग्गा खरिदका लागी अनुदान रकम पाएका छन् ।
जोखिम बस्ती र भूमिहीन भूकम्प पीडितलाई सरकारले जग्गा खरिद गर्न बढिमा २ लाखसम्म उपलब्ध गराउने प्रावधान छ । भूकम्प र त्यस पछिको पहिरोका कारण जिल्लाका ५ सय २६ घरधुरी जोखिममा परेका थिए ।
धार्चे गाउँपालिका–२ केरौजाका २ सय ८५ घरधुरीले लालपुर्जा पाइसकेको राष्ट्रिय पुननिर्माण प्राधिकरण जिल्ला आयोजना कार्यान्वयन इकाइ अनुदान व्यवस्थापन तथा स्थानीय पूर्वाधार कार्यालय गोरखाले जनाएको छ ।
अजिरकोट गाउँपालिकाको २८, चुमनुव्रीको १८ र वारपाक सुलिकोट गाउपालिकाको १६ जना पीडितलाइ पनि लालपुर्जा वितरण भइसकेको दिगो सामाधान परियोजनाकी परियोजना अधिकारी पुष्पा घलेले बताईन ।
चुमनुव्री गाउपालिका–३ सिर्दिवासमा जोखिममा परेका ११ घर धुरीलाई देवलमा एकिकृत वस्ती वस्ने गरी जग्गा खरिद भइसकेको छ । बारपाकको १५, अजिरकोट गाउपालिका स्थित मुच्चोक सावदुरका १७, डिस्काको १, मुच्चोक टार का २, जोगिडाँडाका १, ठुलो ढुङ्गाका २ र दार्मेका १ लाभाग्राहीलाई पनि लालपुर्जा वितरण भइसकेको इकाइले जनाएको छ ।
मुच्चोकबाट विस्थापित भइ गोरखा नगरपालिकाको १५ किलो स्थित नयाँ गाउँमा बस्दै आएका ५ जनाले पनि लालपुर्जा पाइसकेका छन् । जोखिममा रहेका अन्य घरधुरीलाइ सुरक्षित ठाउँमा वस्ती स्थानान्तरण गर्न लालपुर्जा वितरणको तयारी भइरहेको इकाइ प्रमुख रामशरण आचार्यले बताए ।
जिल्लाका भूमिहिन भूकम्प पीडितका लागी पनि जग्गा खरिदका लागी रकम निकासा भएको छ । जग्गा खरिद गर्न चाहने भूमिहिन भूकम्पपीडितलाइ रकम उपलब्ध गराउनका लागी राष्ट्रिय पुननिर्माण प्राधिकरणबाट परिपत्र सहित रकम आएको इकाइले जनाएको छ । जग्गा खरिदका लागी उनीहरुले बढिमा २ लाख रुपैया सम्म अनुदान पाउने छन् । हाल सम्म जिल्लामा ६४ जना भूमिहीन भूकम्पपीडित लाभग्राही पहिचान भएको इकाइले जनाएको छ ।