कैलासबावु श्रेष्ठ
असार २८ गते । नेपाल रेडक्रस सोसाईटी जिल्ला शाखाको राहत सामाग्री चोरी गरेको आरोपमा ४ जना पक्राउ परेका छन । पक्राउ परेका सबैलाई गोरखा जिल्ला अदालतबाट म्याद थप गरी अनुसन्धान थालीएको जिल्ला प्रहरी कार्यालय गोरखाले जानकारी दिएको छ ।
शाखाले गोरखा नगरपालिका ९ को बिरेनचोकमा रहेको गण्डकी बचत तथा ऋण सहकारी संस्था लि.को भवनमा राखेको गोदामबाट राहत सामाग्रीहरु मध्ये त्रिपाल, म्याट्रिस, रेनकोट र कम्बल लगायतका सामाग्री चोरी गरेको भन्दै बारा जिल्ला पचरौता नगरपालिका १ घर भई गोरखा नगरपालिका ९ बस्ने जितेन्द्र माझी, राजकुमार माझी, सियाराम माझी र सञ्जय महतो टर्कीलाई प्रहरीले नियन्त्रणमा लिएको हो ।
आरोपित ४ जनाले असार २६ गते नेपाल रेडक्रस सोसाईटी जिल्ला शाखा गोरखाको अफिसबाट त्रिपाल ५० थान, कम्बल ५० थान, ब्ल्याङकेट १० थान, रेनकोट १ थान, सिल्पीङ ब्याग १० थान चोरी गरेका थिए । आरोपीतहरुले २ लाख ५० हजार बरावरको सामाग्री चोरी गरेको नेपाल रेडक्रस सोसाईटी जिल्ला शाखाका सभापति भगवानबावु मास्केले बताए ।
मास्केका अनुसार चोरी गर्ने उत्त समूहले काटा, चम्चा, म्याट्रिस, प्रेसर कुकर, साबुन, ब्रस, पेष्ट, बाल्टीन, फाईबर सिरक, ट्राउजर जस्ता सामाग्री चोरी गरेका थिए । चोरी गर्ने समूहले ब्याट्री समेत चोरी गरेका थिए । चोरी भएको समाग्री मध्ये अधिकाशं सामाग्री प्रहरीले पक्राउ गरेका आरोपीतहरुको कोठाबाट बरामद गरीएको जिल्ला प्रहरी कार्यालय गोरखाका प्रहरी नायब उपरिक्षक एवं सूचना अधिकारी महेन्द्र नेपालले जानकारी दिए ।
राहत सामाग्री क्षेति पुरयाउने ५ जनालाई सार्वजनिक मुद्वा
शाखाले राहत सामाग्री राखेको स्थानमा राहत सामाग्रीलाई क्षेति पुरयाउने स्थानिय ५ जनालाई पनि नियन्त्रणमा लिएर सार्वजनिक मुद्वा गर्दा गराएको छ ।
स्थानिय धनमाया थापा मगर, गिता पौडेल, अंकमाया राना मगर, सोमबहादुर राना र लालबहादुर राना सहित ५ जनालाई जिल्ला प्रहरी कार्यालय गोरखाले शुक्रबार जिल्ला प्रशासन कार्यालयबाट म्याद थप गरी अनुसन्धान गरी रहेको छ ।
पक्राउ परेका सबैले असार १६ गते त्रिपाल, म्याट्रिस, रेनकोट तथा कम्बल लगायतका राहत सामाग्रीहरुलाई काटी हानी नोक्सानी पुरयाएको भन्दै पक्राउ गरी सार्वजनिक शान्ति बिरुद्वको मुद्वा दर्ता गरेको सूचना अधिकारी नेपालले जानकारी दिए ।
